Маёр УСУ: У Расеі ёсць планы новага ўварвання ва Украіну з тэрыторыі Беларусі

Сітуацыя на мяжы з Беларуссю застаецца напружанай.

Планы новага заходу ва Украіну з тэрыторыі беларускіх абласцей у штабе ворага ёсць. Пра гэта ў інтэрв'ю «Белсату» заявіў украінскі палітолаг, маёр Узброеных сілаў Украіны Тарас Беразавец.

– Я не буду каментаваць сітуацыю з наяўнасцю падраздзяленняў і неабходнасцю іх перакідвання. Гэта таемная інфармацыя. Калі гаварыць у агульных рысах, сітуацыя на мяжы з Беларуссю застаецца напружанай. Вораг не пакідае планаў новага ўварвання з тэрыторыі Беларусі. Мы ведаем.

Планы новага заходу ва Украіну з тэрыторыі беларускіх абласцей у штабе ворага ёсць. На гэты раз размова можа ісці пра падраздзяленні не толькі войска РФ, але і Узброеных сілаў РБ. Гэта абсалютна рэальная сітуацыя.

Вораг і ягоныя дыверсійныя групы актыўна спрабуюць размінаваць палі. Яны спрабуюць пранікаць на нашу тэрыторыю, здымаць міны. Актыўна працуе іхняя шпіёнская сетка. Мы бачым паведамленні пра затрыманні агентаў. Вораг вельмі актыўна сябе паводзіць: запускае дроны, працуе са сваёй агентурнай сеткай, праводзіць інфармацыйна-псіхалагічныя спецаперацыі, як нядаўна гэта зрабіў кіраўнік КДБ Беларусі, наўпрост пагражаючы нанясеннем удару па лякарні ў Кіеве. Лякарня знаходзіцца на Абалоні, гэта ў баку Беларусі, [такая пагроза] з'яўляецца ваенным злачынствам.

– Як прынялі пагрозу Церцеля ў Кіеве? Ён заявіў, што «тэрарысты хаваюцца за дзецьмі ў лякарні і мы з імі расправімся паводле законаў ваеннага часу». Гэта гучала як пагроза. Улады Кіева эвакуявалі лякарню.

– Яны павінны былі гэта зрабіць, калі гучыць наўпростая пагроза ў дачыненні да лекавай установы на вуліцы Багатырскай. Там няма вайскоўцаў, толькі дзеці. Калі ёсць пагроза дзіцячай лякарні… а мы памятаем удары па радзільні ў Марыюпалі, па лякарні ў Дняпры, у Мікалаеве і Херсоне, мы разумеем, што маем справу з ваеннымі злачынцамі. Таму большасць людзей патрабуе эфектыўных захадаў адплаты ў адносінах да ваенных злачынцаў. Многія людзі задаюцца пытаннем, чаму Украіна не б'е па тэрыторыі Беларусі. Тым больш, што ўся эканоміка Беларусі сканцэнтраваная на поўдні ў 100-кіламетровай франтавой паласе. Калі б украінскія дроны, якія ляцяць некалькі тысячаў кіламетраў, прыляцелі ў Беларусь, Лукашэнка застаўся б ні з чым.

– Мазырскі НПЗ – адзін з двух НПЗ, які пастаўляе ў Расею паліва, асабліва на фоне знішчэння ўкраінцамі часткі расейскіх НПЗ, – знаходзіцца на адлегласці 35 км ад мяжы з Украінай.

– Гэта дазваляе падбіць яго нават сродкамі РСЗА. Я думаю, адказ у тым, што Лукашэнка, хутчэй за ўсё, выдатна ўсведамляе, што ў выпадку прамых новых дзеянняў, калі любая ракета ці група вайскоўцаў зойдзе з тэрыторыі Беларусі, ягоная эканоміка будзе знішчаная. Як і будзе нанесены поўны ўдар па месцах дыслакацыі Узброеных сілаў РБ. Хутчэй за ўсё, гэты ўдар не наносіцца, бо Лукашэнка напэўна перадаў нейкія запэўненні, што з тэрыторыі Беларусі нічога пагражаць не будзе. Ён разумее, што яго чакае, калі ён зробіць інакш.

Але мы маем справу з вайсковым злачынцам, марыянеткай Крамля, якому верыць нельга, таму Украіна будзе ахоўваць мяжу і рыхтавацца да любога сцэнара.

У тым ліку ўварвання з тэрыторыі Беларусі. Там будуць знаходзіцца падраздзяленні Узброеных сілаў Украіны, таму што з Беларусі можа быць нанесены новы ўдар па нашых мірных гарадах.