Патрапілі «ў малако»

У безгрунтоўнасці гадавога прагнознага задання па дасягненні станоўчага сальда знешняга гандлю ў памеры 500 млн. USD пераконвалі вынікі ўжо першых месяцаў года. Але ўрад звярнуў на гэта ўвагу бліжэй да лета, заявіўшы, што важнае не столькі сальда знешняга гандлю само па сабе, колькі аплатны баланс. У ім фіксуецца рух усіх валютных рэсурсаў, і калі сума іх прыходу ў краіну перавышае суму ухода, то баланс станоўчы, што не дае падставы для адмысловай турботы, паведамляе газета «Белорусы и рынок».

Аднак знешнегандлёвы баланс таксама адбівае рух валютных сродкаў. Хай толькі ў адной з сфер эканамічнай дзейнасці – у знешнім гандлі. І тут уход нашмат перавышае прыход, прычым дысбаланс ужо перавысіў 2 млрд. USD (столькі Беларусь "недагандлявала" за ўвесь мінулы год) і, судзячы па дынаміцы, цалкам верагодна, дасягне 3 мільярдаў.

Такім чынам, разыходжанне з прагнозам складзе 3,5 млрд. USD і паставіць пад сумненне захаванне станоўчага балансу ў цэлым. Гэта значыць, цалкам верагодна, што Беларусі давядзецца нарошчваць знешнія запазычанні (пакуль даюць).

Відавочна, з гэтай прычыны афіцыйная статыстыка знешнегандлёвай дзейнасці пачынае абрастаць каментарамі. Тыпу вось гэта не атрымалася, таму што ўдвая павысіліся цэны на газ, гэта – таму што рост экспартных цэнаў саступае росту імпартных, гэта – таму што насельніцтва пачало актыўна закупляць легкавыя аўтамабілі і бытавую тэхніку, нягледзячы на наяўнасць у краіне якасных айчынных аналагаў.

Чытаць цікава. Але бянтэжыць мноства агаворак. Калі хочуць сказаць па сутнасці, шматслоўем не грашаць.

Напрыклад, Японія не мае практычна ніякіх рэсурсаў, якія неабходныя яе прамысловасці. Але эфектыўнасць эканомікі такая, што яна мае станоўчае гандлёвае сальда з усімі сваімі партнёрамі. Гэта ўсе ведаюць.

А калі ў Беларусі з усімі сальда адмоўнае, то не трэба будаваць аптымістычных прагнозаў. Каб не патрапіць "у малако"...