Еўропа падтрымала нас (Фота)
7
16:13, — Палітыка
14 кастрычніка беларусаў, якія ўзялі ўдзел у Еўрапейскім Маршы ў Менску, падтрымалі суайчыннікі і аднадумцы ў розных гарадах Еўропы.
У Брусэлі адбылося спецыяльнае мерапрыемства для жадаючых у прамым эфіры сачыць за падзеямі ў беларускай сталіцы, якое арганізавала і правяла няўрадавая арганізацыя «Офіс за дэмакратычную Беларусь». У Бельгіі сабраліся прадстаўнікі еўрапейскіх структур, недзяржаўных арганізацый і беларускай дыяспары ў гэтай краіне. Удзельнікі падтрымалі імкненні беларусаў прыняць 12 прапаноў, якія высунуў Еўразвяз для ўключэння краіны ў Еўрапейскую палітыку добрасуседства. Гаварылася таксама пра салідарнасць з тымі, хто падзяляе каштоўнасці свабоднай і дэмакратычнай Еўропы, паведамілі «Белорусские новости».
Цікавасць, які прадэманстравалі ўдзельнікі мерапрыемства ў Брусэлі, гаворыць пра агульную зацікаўленасць міжнароднай супольнасці да падзей у Беларусі і надзеі на яе дэмакратычнае развіццё, адзначае «Офіс за дэмакратычную Беларусь».
Сваю салідарнасць з беларусамі ў гэты дзень таксама выказалі падчас дэманстрацый у Празе. Як паведамляе інфармацыйнае агенцтва «CTK», каля 40 чалавек сабраліся на адной з цэнтральных плошчаў пад бел-чырвона-белымі сцягамі і лозунгамі «Беларусь – у Еўропу!». Удзельнікі акцыі выказалі падтрымку беларускай еўраінтэграцыі, а таксама заявілі пра тое, што ў будучыні Беларусь павінна стаць сябрам ЕЗ і НАТА. Еўрапейскі Марш у Менску яны назвалі «пачаткам беларускага шляху ў свабодную аб'яднаную Еўропу».
У акцыі ў Варшаве ўзялі ўдзел каля сотні беларускіх студэнтаў, якія навучаюцца ў польскіх ВНУ ў рамках праграмы імя Кастуся Каліноўскага, а таксама палякі. Мерапрыемства падтрымаў дэпутат Еўрапарламента, польскі палітык Януш Анышкевіч, які заявіў пра тое, што спрабаваў правесці гэты дзень у Менску, аднак, яму было адмоўлена ва ўездзе.
Удзельнікі акцыі прайшлі па цэнтры польскай сталіцы з бел-чырвона-белымі сцягамі. Пасля іх чакаў канцэрт: беларускія студэнты выконвалі хіты беларускіх рок-гуртоў. Пад песню N.R.M. «Паветраны шар» моладзь выпусціла ў неба паветраныя шары з сімволікай Еўразвяза.
Еўрапейская і амерыканская прэса шырока асвятляла Еўрапейскі Марш у Менску. Публікацыі пра тое, што ў беларускай сталіцы прайшла дэманстрацыя салідарнасці беларусаў з ідэяй еўраінтэграцыі з'явіліся нават у газетах і на інтэрнэт-парталах Аўстраліі, Ірана і Новай Зеландыі.
Правядзенне Еўрапейскага Марша ў Менску падтрымалі прадстаўнікі ўрадаў еўрапейскіх краін, ЗША, а таксама Еўракамісіі і Еўрапарламента. Яны таксама асудзілі затрыманні актывістаў апазіцыі і арганізатараў напярэдадні дэманстрацыі.
Варшава
Варшава
Варшава
Варшава
Варшава
Варшава
Варшава
Варшава
Прага
Прага
Экспарт
