Сьмех скрозь сьлёзы – 2

Працягваем друкаваць адыёзныя выказваньні сьведкаў-міліцыянтаў, амапаўцаў, сабраныя на шматлікіх судах над моладзевымі дэмакратычнымі актывістамі.

На гэты раз у галоўнай ролі выступае Менскі СОБР. Месца падзей – суд Цэнтральнага раёну, дзе па ілжывых абвінавачаньнях судзілі актывістак «Маладога Фронту» Людвісю Атакулаву, Кацярыну Галіцкую і Кацярыну Краснову. За акцыю падтрымкі тады яшчэ зьняволенага Артура Фінькевіча дзяўчаты атрымалі па 15 сутак, паведамляе сайт «Маладога Фронта».

А.П. Скрыганоўскі, 1985 г, спэцназавец. Суд над Касей Красновай:

Адвакат: За што вы затрымалі дзяўчат?

Скрыганоўскі: Яны спрабавалі пракрасьціся на каток

Адвакат: Што значыць пракрасьціся?

Скрыганоўскі: Не разумею пытаньня

Адвакат: Якім чынам яны ішлі?

Скрыганоўскі (незадаволена): Якім-якім! Пуцём хады на двух нагах у бок катка…

Маўчаньне…

Адвакат: А як Вы іх затрымлівалі?

Скрыганоўскі: Мы захадзілі з франта.

Бульшэўскі В М., 1980 г., спэцназавец, другі сьведка. Суд Касі Красновай:

Адвакат: За што Вы затрымалі дзяўчат?

Бульшэўскі: (ганарліва) Яны трымалі сьцяг антыдзяржаўнага характару! І ваабшчэ! Яны хуліганілі, бэйджыкі ў нас зрывалі!

Булдышэўскі В М. на судзе Касі Галіцкай:

Адвакат: Як Вы вызначылі, што гэта быў сьцяг?

Булдышэўскі: Бо ён быў падобны на яго.

Адвакат: А падрабязьней можна?

Булдышэўскі: Да што падрабязьней? Дзе там дзірачкі якія, дзе плямы, я не разглядаў…

Адвакат: А ці было ў яго дрэўка?

Булдышэўскі: Было. А можа і не. Ня памятаю

Адвакат: А што Кася зрабіла зь ім пасьля?

Булдышэўскі: Паклала ў торбу

Адвакат: Дык калі яна схавала сьцяг у торбу, як Вы думаеце, ці было ў сьцяга дрэўка?

Булдышэўскі: Ня памятаю, нічога я ня памятаю.