Суды заплюшчваюць вочы на парушэнні міліцыянтаў

22 мая судовая калегія па грамадзянскіх справах Брэсцкага абласнога суда разгледзела касацыйную скаргу групы рэгіянальных актывістаў руху "За Свабоду" на рашэнне суда Ленінскага раёна Брэста, у якой яны абскардзілі неправамерныя дзеянні супрацоўнікаў міліцыі. Скарга пакінутая без задавальнення.

Як распавёў праваабаронца Раман Кісляк, актывісты Дзяніс Турчаняк, Інга Абрамава, Жанна Абрамава і Сяргей Вакуленка лічаць, што ім было адмоўлена ў правасуддзі як у судзе Ленінскага раёна горада Брэста, так і ў Брэсцкім абласным судзе. Па іхным меркаванні, дзеянні, якія былі прадпрынятыя ў іх стаўленні супрацоўнікамі міліцыі, неправамерныя і ўшчамляюць іх грамадзянскія правы. Пасля атрымання тэксту азначэння абласнога суду яны маюць намер адстойваць сваю пазіцыю ў Камітэце ААН па правах чалавека.

Сутнасць скаргі актывістаў у першую судовую інстанцыю ў тым, што 13 снежня 2007 года яны прыйшлі ў суд Ленінскага раёна Брэста з намерам прысутнічаць на судовым разглядзе па адміністрацыйнай справе свайго знаёмага актывіста руху «За Свабоду» Андрэя Шарэнды, якое афіцыйна лічылася адкрытым. Дарогу ў залу судовых паседжанняў заступілі тры супрацоўніка міліцыі і запатрабавалі выдаліцца (і выдалілі з будынка суда) актывістаў і людзей, што знаходзіліся там з той жа мэтай. На працягу ўсяго судовага разгляду ў будынак суда яны нікога не ўпускалі.

"Такія дзеянні супрацоўнікаў міліцыі, лічаць актывісты, з'яўляюцца парушэннем іх права на атрыманне інфармацыі, прадугледжанага артыкулам 19 Міжнароднага пакта аб грамадзянскіх і палітычных правах і артыкулам 34 Канстытуцыі Рэспублікі Беларусь. У Камітэт ААН па правах чалавека актывісты маюць намер прадставіць індывідуальнае паведамленне як аб парушэнні права на атрыманне інфармацыі (артыкул 19 Пакта), так і аб адмове ім у правасуддзі, што ў сваю чаргу парушае артыкул 14 Пакта", — дадаў праваабаронца.