Літоўскі суд пакінуў пад вартай савецкага амапаўца

Суд Вільнюса задаволіў просьбу пракуратуры аб падаўжэнні папярэдняга зняволення для былога байца савецкага АМАПу Канстанціна Нікуліна (Міхайлава).

Пра гэта паведамляе "Інтэрфакс". Нікулін, якога вінавацяць у дачыненні да забойстваў літоўскіх памежнікаў у 1991 годзе, пакінуты пад вартай яшчэ на два месяцы.

Былы амапавец быў затрыманы ў Рызе ў лістападзе 2007 года. Разгледзеўшы яго справу, Вярхоўны суд Латвіі вырашыў выдаць яго праваахоўным органам Літвы.

Як паведамлялі СМІ, Канстанцін Нікулін змяніў прозвішча на Міхайлаў у сувязі з тым, што выступаў сведкам па справе аб забойстве кіраўніка падатковага ўпраўлення Лудзенского раёна Латвіі. У адпаведнасці з яго статусам, сілавыя структуры забяспечылі яму праўную абарону і выдалі новыя дакументы.

Сам ён сцвярджае, што за ўсё жыццё не забіў аніводнага чалавека і іншых злачынстваў таксама не чыніў.

Увесну-улетку 1991 года, пасля таго як Вярхоўная рада Літвы абвясціла яе незалежнасць ад СССР, і да таго як яе суверэнітэт быў прызнаны міжнароднай супольнасцю, адбылася серыя нападаў на памежныя пасты рэспублікі. Пагромам, у якіх удзельнічалі байцы рыжскага і віленскага АМАПу СССР, зведалі і пасты суседняй Латвіі.

Забойствы на прапускным пункце Мядзінінкай, да якіх, на думку літоўскай пракуратуры, мае дачыненне Канстанцін Нікулін, былі здзейснены ў ліпені 1991 года. Злачынцы застрэлілі сямёра памежнікаў і мытнікаў. Пракуратура Літвы лічыць, што трое іншых падазраваных у гэтым злачынстве хаваюцца ў Расеі.