Палітвязню Сяргею Парсюкевічу дазволілі спатканне з сям'ёй
9:33, — Палітыка
29 траўня жонка віцебскага прадпрымальніка Сяргея Парсюкевіча Наталля ўпершыню выправіцца на спатканне з мужам.
Нагадаем, віцебскі прадпрымальнік Сяргей Парсюкевіч быў арыштаваны ў Менску 4 сакавіка. Затрыманы нібыта за "гвалтоўныя дзеянні супраць супрацоўніка міліцыі".
Сяргей Парсюкевіч трапіў пад арышт за ўдзел у мітынгу прадпрымальнікаў 10 студзеня ў Менску і быў прысуджаны да 15 сутак арышту, якія правёў у спецпрыёмніку-размеркавальніку на вуліцы Акрэсціна. Па сведчанні Парсюкевіча, 21 студзеня ён быў жорстка збіты супрацоўнікам спецпрыёмніка Аляксандрам Дулубам. Пазней гэты міліцыянт, каб пазбегнуць абвінавачанняў у перавышэнні паўнамоцтваў, сам абвінаваціў Сяргея ў тым, што арыштант яго збіў.
Суд Маскоўскага раёна Менска прысудзіў прадпрымальніка да 2,5 гадоў калоніі агульнага рэжыму.
- У чацвер еду ў Жодзіна, дзе трымаюць Сярожу, - паведаміла Наталля Парсюкевіч сайту perspektyva.org. - Першы раз еду, а таму ўсю гэтую працэдуру спаткання як след яшчэ і не ведаю.
- Якія апошнія навіны ад яго атрымалі?
- Піша лісты, чакае спаткання. Яшчэ паведамляе пра сваё здароўе, якое стала пагаршаецца. Цяпер ён знаходзіцца ў Жодзінскай санчастцы і піша, што ўмовы жудасныя. Горш чым у той камеры, дзе сядзеў. Плюс да ўсяго, увагі з боку медыкаў ніякай.
- Ведаем, што Сяргею патрэбныя адмысловыя лекі…
- Так, і ён спрабаваў нечага дамагчыся ад санчасткі. Дамогся. Узялі аналіз крыві - і ўсё. Нават лекара свайго не бачыў з таго моманту, як мужа туды змясцілі. І вось літаральна сёння атрымала ад яго чарговы ліст, дзе ён апісвае сваіх сукамернікаў. Кажа, што людзі там настолькі бедныя і галодныя, што нават крошкі злізваюць са стала. Чытаць усё гэта проста жудасна.
- Вас муж просіць нешта прывезці?
- Усё просіць. Перадачу павязу, але я ж не ведаю, што там возьмуць, а што не возьмуць.
- Наталля, колькі часу вы прабудзеце ў Сяргея?
- Сказалі, што мне дазволена там знаходзіцца з 9 раніцы да 15.00. Гэта вельмі мала.
