Барыс Гарэцкі: Пра завочныя прысуды ўспомняць перад чарговай палітычнай акцыяй
2- 30.05.2008, 10:51
Апошнiм часам у белорусскіх судоў з’явілася «мода» на прысуды маладзёжным актывiстам з фармулёўкай "суд асудзiў да завочнага арышту".
Што ж гэта за з'ява такая — "завочны арышт"? “Народнай волі” тлумачыць моладзевы актывіст Барыс Гарэцкі.
— Па 7 сутак завочнага арышту нядаўна атрымалi Змiцер Дашкевiч, Артур Фiнькевiч, Змiцер Хведарук i Павел Юхневiч, — расказвае Гарэцкi. — Справа ў тым, што падчас iх затрымання i складання пратаколаў з усiх узялi распiскi, што затрыманыя просяць разгледзець справы ў судзе ў iх адсутнасць. I яны напiсалi такiя распiскi, каб не заставацца ў пастарунку, пасля чаго суды завочна разгледзелi iх справы i вынеслi па 7 сутак арышту. Недзе праз 5—6 дзён пасля вынясення прысудаў хлопцы атрымалi судовыя пастановы поштай, а да некаторых ужо наведвалiся i мiлiцыянеры. I гэта азначае, што хлопцы павінны будуць рана цi позна адсядзець гэтыя "суткi". Як толькi iх затрымаюць.
— Але ж яшчэ нiхто не адсядзеў…
— Нiхто. I такое ўражанне, што пакуль яны асаблiва нiкому не патрэбны. Але, думаю, пра іх абавязкова ўспомняць перад якой-небудзь палiтычнай акцыяй.
Хлопцы, якiх завочна прыгаварылi да арышту, знаходзяцца ў Беларусi i ад мiлiцыi не хаваюцца. Але па нейкай прычыне iх пакуль не арыштоўваюць. Магчыма, сапраўды чакаюць чарговай акцыi апазiцыi...
