Расея не ўпадабала літоўскі сыр

Расея ўвяла часовую забарону на ўвоз сыра аднаго з найбуйных літоўскіх вытворцаў, кампаніі "Рокішкіа Сурыс".

Па словах прэс-сакратара расейскай службы па ветэрынарным і фітасанітарным наглядзе Аляксея Аляксеенкі, забарона на ўвоз літоўскай прадукцыі будзе ўведзена ад 16 чэрвеня ў сувязі з "парушэннямі літоўскім вытворцам расейскіх ветэрынарна-санітарных нормаў" - у сырах было выяўлена перавышэнне дапушчальнага ўтрымання бактэрый, паведамляе агенцтва РІА Новости.

Ён таксама адзначыў, што забарона будзе дзейнічаць, пакуль літоўскі вытворца сыра не прапануе расейскаму боку пераканаўчых доказаў бяспекі сваёй прадукцыі і яе адпаведнасці санітарным нормам РФ.

Як заўважае «Наша ніва», аналагічныя забароны дагэтуль канчаткова не знятыя на грузінскія і малдаўскія віны. Улады гэтых краінаў назвалі падобныя рашэнні палітычна матываванымі. Дарэчы, рашэнне аб забароне на ўвоз літоўскага сыра было прынята праз некалькі тыдняў пасля таго, як Літва зняла сваё вета на перамовы ЕЗ-Расея, якое моцна раздражняла Расею.