Пуцёўкі ў санаторыі Беларусі раскупленыя да канца восені

Пуцёўкі ў беларускія санаторыі раскупленыя да канца восені, паведаміў 2 чэрвеня на прэс-канферэнцыі ў Менску намеснік дырэктара Рэспубліканскага цэнтра па аздараўленні і санаторна-курортнаму лячэнню насельніцтва Генадзь Балбатоўскі.

Ён заўважыў, што попыт на паслугі беларускіх санаторыяў "апярэджвае прапанову".

Пры гэтым Г.Балбатоўскі заўважыў, што санаторыі выдзяляюць цэнтру пуцёўкі тэрмінам на 21 дзень сярэднім коштам 800 тыс. рублёў для дарослых і 650-720 тыс. - для дзяцей. Гэтыя пуцёўкі выдзяляюцца грамадзянам у парадку чаргі. Пры гэтым ён заўважыў, што падвышэнне коштаў на пуцёўкі, што выдзяляюцца праз цэнтр па аздараўленні і санаторна-курортным лячэнні, складае 1,5% у месяц.

"Што датычна свабоднай рэалізацыі, -- сказаў ён, -- усталёўваць кошт -- права ўласніка. Ёсць санаторыі, пражыванне і лячэнне ў якіх каштуе больш за 140 тыс. рублёў у суткі. І яны карыстаюцца попытам. Калі ёсць попыт, то сэнсу паніжаць кошты для ўласніка няма. Такім чынам, існуючыя кошты дыктуюць умовы рынка".

У Беларусі ўласнікамі аздараўленча-курортных устаноў з'яўляюцца 28 арганізацый, у тым ліку прыватныя ўнітарныя прадпрыемствы.