Пацярпелыя ад «жывога шчыта» не будуць абскарджваць прысуд

Адвакат Вера Страмкоўская лічыць прысуд «досыць мяккім», але абскарджваць яго пацярпелыя ад «жывога шчыта» не будуць, - заявіла Страмкоўская пасля абвяшчэння прысуду.

В.Страмкоўская падкрэсліла, што задаволеная абвінаваўчым прысудам супрацоўнікам ДАІ, выказаўшы надзею на тое, што пасля дадзенага суду практыка выстаўлення «жывога шчыта» спыніць сваё існаванне ў Беларусі, паведамляе Інтэрфакс.

Разам з тым адвакат заявіла, што будзе пададзены пазоў у грамадзянскі суд на 25 млн рублёў за пабітыя ў ДТЗ аўтамабілі.

У сваю чаргу, пракурор, які падтрымаў дзяржаўнае абвінавачванне ў судзе, Мікалай Дубянок заявіў журналістам, што "прысуд быў вынесены ў рамках пакарання, прадугледжанага часткай 1 артыкулу 426 Крымінальнага кодэкса Беларусі, па якому было прад'яўленае абвінавачванне супрацоўнікам ДАІ".

Аднак ён адмовіўся каментаваць рашэнне суду, спаслаўшыся на тое, што прысуд пакуль не ўступіў у законную сілу.

Нагадаем, падсудныя супрацоўнікі ДАІ стварылі ў пачатку сакавіка на трасе Менск-Мікашэвічы для затрымання парушальніка «жывы шчыт» з прыватных аўтамабіляў, у якіх знаходзіліся пяцёра дарослых пасажыраў і адно дзіця, падвергнуўшы такім чынам іх жыцці небяспецы.

Суд прызнаў камандзіра 2-га ўзвода аддзела ДАІ Кастрычніцкага раёна Менска маёра міліцыі Г.Дарагакупца і інспектара дадзенага ўзвода старэйшага лейтэнанта міліцыі А.Ліхтаровіча вінаватымі і прысудзіў да двух гадоў умоўна з адтэрміноўкай выканання прысуду на тры гады.