Лукашэнка жадае мець дасье на кожнага беларуса
33
15:46, — Палітыка
22 ліпеня Аляксандр Лукашэнка падпісаў закон "Аб рэгістры насельніцтва". Законам створаная прававая аснова для фармавання ў Беларусі адзінай сістэмы ўліку персанальных дадзеных грамадзян.
Акрамя таго, сістэмай будуць улічвацца таксама замежныя грамадзяне і асобы без грамадзянства, якія пастаянна пражываюць у краіне.
У рэгістры будуць аб'яднаныя існуючыя ў розных дзяржарганізацыях разрозненыя сістэмы ўліку фізічных асоб, што дазволіць "найбольш поўна забяспечыць рэалізацыю правоў і законных інтэрасаў грамадзян, скараціць перапіску і запыты арганізацый пры працы з грамадзянамі", -- адзначае прэс-служба Лукашэнкі.
У рэгістр насельніцтва, паведамляе прэс-служба, будуць уключаныя персанальныя дадзеныя грамадзян: прозвішча, імя, імя па бацьку, пол, дата і месца нараджэння і смерці, грамадзянства, сямейнае становішча, месца жыхарства, род заняткаў, падатковыя абавязанні і інш. Аб'ектыўна і аператыўна ідэнтыфікаваць фізічную асобу і яе грамадзянскі статус дазволіць ідэнтыфікацыйны нумар, унікальны для запісу ў рэгістры ў адносінах кожнага грамадзяніна.
Фармаванне рэгістра насельніцтва будзе ажыццяўляцца дзяржаўнымі арганізацыямі, ад грамадзян спатрабаванне якіх-небудзь дадзеных не прадугледжанае. "Кіраванне такім масівам канфідэнцыйнай інфармацыі ўскладзенае на распарадчыка рэгістра — Міністэрства ўнутраных спраў", — адзначаецца ў паведамленні.
Прэс-служба таксама падкрэслівае, што "стварэнне ў Беларусі рэгістра насельніцтва заснаванае на дадатным досведзе цывілізаваных замежных дзяржаў, якія ўжо стварылі або ўкараняюць адзіны банк персанальных дадзеных сваіх грамадзян, падобныя рэгістры функцыянуюць у больш за 60 краінах свету, гэта значыць амаль у кожнай трэцяй краіне".
Напісаць каментар (33)
