Грошы на вецер: аграгарадкі каштуюць як чатыры «Белтрансгазы»
9
10:22, — Эканоміка
Адміністрацыя Аляксандра Лукашэнкі рыхтуе рэвізію праграмы «адраджэння і развіцця вёскі». Да гэтага фактычна заклікаў першы намеснік кіраўніка Адміністрацыі прэзідэнта Беларусі Аляксандр Папкоў.
На думку Папкова, неабходна напалову зменшыць планы па стварэнні ў краіне аграгарадкоў. Карэспандэнт "Завтра твоей страны" высвятліў, колькі грошай на іх ужо пакладзена звыш каштарысу.
Нядаўняе інтэрв'ю, якое даў Першаму нацыянальнаму каналу першы намеснік кіраўніка, уключана ў Інфармацыйны бюлетэнь Адміністрацыі прэзідэнта. Цяпер бюлетэнь мэтава распаўсюджваецца сярод абласной і раённай вертыкалі.
Патрэбу ў рэвізіі праграмы, якая мяркуе значнае змяншэнне заданняў па адраджэнні беларускай вёскі, Аляксандр Папкоў аргументуе "абазнанай аптымізацыяй выдаткаў". На думку Папкова, столькі аграгарадкоў, колькі прадугледжвала раней праграма адраджэння вёскі, як выявілася, Беларусі ўжо не трэба.
Паводле праграмы, нагадаем, планавалася на працягу 2005 - 2010 гадоў стварыць у краіне 1481 аграгарадок. Аляксандр Папкоў лічыць, што "з улікам узбуйнення гаспадарак, калі кожны аграгарадок займее прыкладна 10-12 тыс. гектараў сельскагаспадарчых угоддзяў, 750-800 аграгарадкоў будзе дастаткова, але іх павінна быць не больш за 1000". Пакуль статус аграгарадкоў за 2005-2007 гады атрымалі 666 населеных пунктаў: 164 - у 2005, 249 - у 2006, 253 - у 2007 гадах.
Ініцыятыва Папкова, якую цяпер актыўна піяраць у "нізах", мае пад сабой выразны і сумны эканамічны падмурак: аб'ёмы сродкаў, дадзеных цягам апошніх трох гадоў на вёску, толькі з вынікаў трэцяга года выканання праграмы перавысілі план амаль на траціну. Так, у 2005 годзе паводле ўказу прэзідэнта ад 25 сакавіка 2005 года №150 планавалася на гэтыя мэты скіраваць 10,1 трл. рублёў. Насамрэч было выдаткавана 11,8 трл. рублёў. У 2006 годзе малюнак яшчэ горшы - запланавана па ўказе 10,5 трл., выдаткавана - 14,4 трл. рублёў. Мінулы год стаў "рэкардсменам" па выйсцю за межы каштарысу: пачатковы план 11,1 трл., выдаткавана 18,4 трл. рублёў. Агулам на вёску за тры гады дзеяння праграмы было выдаткавана каля 45 трл. рублёў. Сума каласальная. Для параўнання: гэта - чатыры "Белтрансгазы". Пры гэтым той, хто бачыў новабудоўлі хатак у шматлікіх аграгарадах, можа ацаніць эфектыўнасць гэтых укладанняў.
Самае цікавае, што ў сваім пасажы з нагоды неабходнасці скарачэння колькасці аграгарадаў А. Папкоў апелюе да Аляксандра Лукашэнкі. У прыватнасці, у яго інтэрв'ю сказана, што "кіраўнік дзяржавы рабіў акцэнт на змяншэнне колькасці аграгарадоў". Хоць у сакавіку 2007 года кіраўнік дзяржавы падкрэсліваў, што "праграма адраджэння і развіцця беларускай вёскі не зведае значных карэктовак".
Наўрад ці скарачэнне колькасці аграгарадоў напалову з'яўляецца малаважнай карэктоўкай…
Навіны
па тэме
