У Беларусі хочуць правесці чэмпіянат свету сярод лесарубаў

Міністэрства лясной гаспадаркі падало заяўку на правядзенне ў Беларусі чэмпіяната свету сярод лесарубаў.

«Мы зарэгістраваныя ў якасці кандыдата на правядзенне чэмпіяната свету 2012 года», - паведамілі «Ежедневнику» у Мінлясгасе, растлумачыўшы, што спадзяюцца на станоўчае рашэнне пытання.

Пакуль беларускія алімпійцы спаборнічалі з беларускімі хлебаробамі, працаўнікі сякеры і бензапілы на мінулым у Нясвіжскім лясніцтве Клецкага лясгаса чэмпіянаце краіны «Лесаруб-2008» высвятлялі, хто з іх мацнейшы. Высвятлілі - перамагла каманда Менскага ВЛГА. У цяперашні час камплектуецца каманда, якая адправіцца на чэмпіянат свету, які пройдзе ў Германіі.

«У склад зборнай павінныя ўвайсці тры дарослых вальшчыка і адзін юніёр. Сярод кандыдатаў мы, хутчэй за ўсё, адбярэм аднаго-двух запасных. У верасні правядзем апошні трэніравальны збор. Карціна стала змяняецца: тыя, хто перамагаў яшчэ ў маі, да піка сваёй формы цяпер не падышлі. Непарушныя толькі пазіцыі нашага чэмпіёна мінулага і гэтага гадоў Юрыя Несцяровіча. Ён адназначна ў складзе зборнай», - растлумачыў «Е» кадравую палітыку галоўны спецыяліст аддзела прамысловай вытворчасці Мінлясгаса Мікалай Патоцкі. Збор падоўжыцца тры-чатыры дні і пройдзе ў адным з лясгасаў Менскага раёна, каб не з'яжджаць далёка ад сталіцы. Падчас збораў ніхто з удзельнікаў, натуральна, працаваць не будзе.

«На мінулым чэмпіянаце ў Эстоніі мы занялі 11-е месца - гэта даволі сур'ёзны поспех. Нават расейцы, якія ў асабістым першынстве заваёўвалі залатыя медалі, спыніліся на 17-м. Вельмі моцна выступаюць італьянцы, немцы, аўстрыйцы, усе Скандынаўскія краіны, Галандыя. Думаю, трапленне ў дзясятку будзе добрым вынікам», - заявіў «Е» М.Патоцкі. Але галоўныя надзеі ўсё жа ўскладаюцца на правядзенне сусветнага першынства на тэрыторыі Беларусі. Бо на апошнім сусветным першынстве перамаглі эстонцы, якія змаглі выкарыстаць фактар родных сцен.

Варта сказаць, што ЧС сярод лесарубаў праходзіць раз у два гады. Ужо вырашана, што чэмпіянат 2010 года пройдзе ў Харватыі. Менавіта таму Беларусь арыентуецца на 2012-ы. Якая матэрыяльная база спатрэбіцца ў тым выпадку, калі заяўка будзе здаволеная, яшчэ не ясна. «З гэтымі пытаннямі мы цяпер і едзем на чэмпіянат свету. Агульныя правілы правядзення існуюць, але да кожнага пэўнага турніру ўносяцца карэктоўкі», - растлумачыў «Е» М.Патоцкі.