Лукашэнка: Забаўкі - гэта нецікава. Важная ідэалогія

Беларускі кіраўнік раскрытыкаваў працу афіцыйных СМІ.

Пра гэта паведамілі агенцтву «Інтэрфакс» у прэс-службе Лукашэнкі па выніках нарады аб задачах па вырашэнні найбольш актуальных пытанняў сацыяльна-эканамічнага развіцця Беларусі ў 2010 годзе.

«Кіраўнік дзяржавы лічыць недастатковай ідэалагічную працу, якая праводзіцца ў краіне. Ён звярнуў на гэта асаблівую ўвагу кіраўніка Адміністрацыі прэзідэнта Уладзіміра Макея», - адзначылі ў прэс-службе. «Прэзідэнт жорстка раскрытыкаваў дзяржаўныя сродкі масавай інфармацыі, як друкаваныя, так і электронныя», - падкрэслілі там.

«Сродкі масавай інфармацыі ніяк сёння не працуюць. Тэлебачанне ў нас, ды як і за мяжой, - глядзець няма чаго. Радыё ў Беларусі ўжо ніхто не слухае. А па тэлевізары глядзяць кліпы. Забаўкі, усё гэта нецікава. І ў мяне такое ўражанне, што там ужо і кіраўнікі забыліся, што яны з'яўляюцца суб'ектамі ідэалагічнай працы», - прывялі ў прэс-службе слова Лукашэнкі.

Паводле яе інфармацыі, кіраўнік дзяржавы паказаў на неабходнасць звярнуць пільную ўвагу і на працу сродкаў масавай інфармацыі ў рэгіёнах. «Ён адзначыў, што рэгіянальныя СМІ не павінны займацца ўсхваленнем мясцовай улады, і, калі ёсць факты для крытыкі - дык не замоўчваць іх, як бы гэта не гучала прыкра для мясцовай улады», - патлумачылі ў прэс-службе.