У Берасці затрымалі ўдзельнікаў акцыі «Давай абдымемся»
31- 27.01.2010, 16:19
Акцыю, якую праводзяць ва ўсім свеце, беларуская міліцыя жорстка спыніла і склала на ўдзельнікаў пратаколы.
У Берасці спрабавалі правесці моладзевую акцыю пад назвай «Давай абдымемся». Яна не насіла палітычнага або рэлігійнага характару. Асноўная яе мэта – узняць сабе і мінакам настрой.
Бясплатныя абдымкі (Free Hugs) - рух, удзельнікі якога выходзяць на вуліцы і прапануюць незнаёмым людзям абняцца. Заснавана аўстралійцам Хуанам Манам у 2004 годзе. Міжнародную вядомасць рух набыў у 2006 годзе дзякуючы музычнаму відэакліпу аўстралійскага рок-гурту «Sick Puppies», размешчаным на YouTube.
Як паведамляе «Белорусский партизан», у ЗША такая кампанія доўжыцца ўжо не адзін год. Але ў Берасці - міліцыя больш пільная. Толькі маладыя людзі сабраліся з плакатамі «Давай абдымемся» і «Бясплатна адбыму», як вартавыя парадку западозрылі нешта супрацьпраўнае.
Для ўдзельнікаў акцыя скончылася ў апорным пункце міліцыі, дзе было складзена 4 адміністрацыйныя пратаколы (незаконная арганізацыя дзейнасці грамадскага аб'яднання, рэлігійнай арганізацыі або фонду альбо ўдзел у іх дзейнасці).