Зборная Галандыі выйшла ў фінал Чэмпіянату свету
19- 7.07.2010, 10:55
У паўфінале галандцы перамаглі зборную Уругвая з лікам 3:2.
У вырашальным спаборніцтве, які адбудзецца 11 ліпеня, Галандыі будзе супрацьстаяць пераможца другога паўфіналу, у якім сустрэнуцца зборныя Гішпаніі і Нямеччыны, паведамляе Lenta.ru.
Галандцы адкрылі лік на 18-й хвіліне гульні з Уругваем - дасягнуў мэты далёкі ўдар капітана зборнай Нідэрландаў Джавані ван Бронкхарста. Адгуляліся паўднёваамерыканцы ў фінале першага тайма: з далёкім ударам Дзіега Форлана не справіўся галандскі брамнік Мартэн Стэкеленбург.
На 70-й хвіліне галандцаў вывеў наперад Вэслі Снэйдэр. Калі Снэйдэр біў па варотах, яго партнёр па камандзе Робін ван Персі, магчыма, знаходзіўся ў становішчы «па-за гульнёй». І хоць мяча ван Персі не закрануў, у галявы эпізодзе ён узяў удзел. Арбітр Раўшан Ірматаў з Узбекістана палічыў, што афсайду не было, і залічыў гол Снэйдэра.
Яшчэ праз тры хвіліны галандцы забілі трэці гол – Ар’ен Робэн галавой скіраваў мяч ў вароты саперніка пасля падачы з флангу ў выкананні Дзірка Кейта.
Уругвайцам удалося скараціць адставанне да мінімума ўжо ў дадатковы час - Максіміліяна Перэйра нанёс дакладны ўдар з-за межаў штрафной. Аднак дамагчыся большага паўднёваамерыканцы не змаглі, і цяпер іх чакае матч за трэцяе месца.
Што тычыцца зборнай Галандыі, то яна ў фінале згуляе з Гішпаніяй ці Нямеччынай. Паўфінальны матч гэтых зборных пройдзе 7 ліпеня і пачнецца ў 21:30.