ААН вінаваціць Беларусь у незаконных пастаўках зброі ў Кот-д'Івуар
20- 28.02.2011, 8:58
Генеральны сакратар ААН Пан Гі Мун абвінаваціў Беларусь у незаконных пастаўках баявых верталётаў у Кот-д'Івуар.
Аб гэтым паведамляе ў панядзелак РІА "Новости" са спасылкай на агенцтва Асашыэйтэд Прэс.
Па дадзеных ААН, Менск, у парушэнне уведзеных яшчэ ў 2004 году міжнароднай арганізацыяй санкцый, пачаў пастаўкі трох баявых верталётаў узброеным фарміраванням, якія падтрымліваюць не прызнанага сусветнай супольнасцю прэзідэнта краіны Ларана Гбагбо.
Як паведамляе офіс кіраўніка ААН, першы верталёт і нейкія "адпаведныя матэрыялы", як мяркуецца, былі дастаўлены самалётам у сталіцу афрыканскай краіны горад Ямусукро ў ноч з нядзелі на панядзелак. Прыбыццё яшчэ некалькіх бартоў нібыта запланаванае на аўторак.
Як паведаміў офіс Пан Гі Муна, пастаўкі вайсковай тэхнікі і маёмасці сілам, якія падтрымліваюць Гбагбо, з'яўляюцца "сур'ёзным парушэннем эмбарга, уведзеным у дачыненні Кот-д'Івуара, дзеючага з 2004 года".
"Парушэнне было неадкладна вынесенае на разгляд камітэта Рады бяспекі, адказнага за ўжыванне санкцый", - цытуе Асашыэйтэд Прэс заяву генеральнага сакратара ААН, які заклікаў да склікання экстранай сустрэчы РБ ААН па дадзеным пытанні.
Як адзначаецца ў заяве, кіраўнік ААН запатрабаваў ад міратворчага кантынгенту ў Кот-д'Івуары "пільна сачыць за сітуацыяй і распачаць усе неабходныя меры ў межах існуючага мандата, накіраваныя на тое, каб забяспечыць немагчымасць выкарыстання дастаўленага абсталявання".
У пачатку снежня мінулага года ў Кот-д'Івуары прайшоў другі тур прэзідэнцкіх выбараў - яны былі першымі пасля пачатку грамадзянскай вайны (у 2002 годзе), якая завяршылася ў 2004 годзе усталяваннем хісткага міру. Па дадзеных ЦВК, на выбарах перамог Аласан Уатара.
Аднак Канстытуцыйны савет фактычна прысудзіў перамогу дзеючаму прэзідэнту Гбагбо. І Уатара, і Гбагбо абвясцілі сябе прэзідэнтамі, прыняўшы кожны сваю прысягу і сфарміраваўшы ўласныя ўрады. Міжнародная супольнасць высунула ўльтыматум Гбагбо, заклікаўшы яго саступіць уладу Уатару, легітымнасць якога была фармальна прызнаная Генеральнай асамблеяй ААН.
"Блакітныя каскі" апынуліся фактычна ўцягнутыя ў палітычнае супрацьстаянне паміж пераможцам і прайгралі на лістападаўскіх прэзідэнцкіх выбарах, якія паставіла краіну на мяжу аднаўлення грамадзянскай вайны. Міратворцы ААН ахоўваюць абранага прэзідэнта Уатару ў ягоным штабе ў адной з гасцініц горада Абіджан ад гвалту з боку не жадаючага прызнаваць паражэнне прэзідэнта Ларана Гбагбо. Ахвярамі беспарадкаў, па апошніх дадзеных, ужо сталі больш за 200 чалавек.
У склад місіі ААН, якая налічвае больш за 9 тысяч чалавек, уваходзяць ваеннаслужачыя і паліцыянты з 54 краін, у тым ліку з Расеі і Украіны.
У цяперашні час сітуацыя ў гэтай заходнеафрыканскай краіне застаецца нестабільнай. Гбагбо па-ранейшаму кантралюе парты і ўзброеныя сілы, у той час як Уатара заблакаваны ў адной з гасцініц Абіджан, дзе ягоную бяспеку забяспечваюць міратворчыя войскі ААН.