У Польшчы пачалі збіраць кампутары для беларускіх журналістаў
6- 1.03.2011, 10:23
Арганізатары спадзяюцца, што польскія грамадзяне і кампаніі ахвяруюць для беларусаў некалькі дзясяткаў кампутараў: як новых, так і патрыманых.
28 лютага ў Польшчы пачалася акцыя па зборы кампутараў і ноўтбукаў для беларускіх журналістаў і праваабаронцаў, тэхніку у якіх канфіскавалі супрацоўнікі КДБ. У ініцыятыве арганізацыі «Вольная Беларусь» удзельнічае шэраг польскіх грамадскіх аб'яднанняў.
Адна з іх - Польскі прэс-клуб, які падтрымлівае журналістаў і свабоду слова ў 27 краінах свету. Ягоны старшыня Ярослаў Владарчык (Jarosław Włodarczyk) распавёў «Еўрарадыё» аб планах ініцыятывы:
«Мы спадзяемся вясной сабраць, як мінімум, некалькі дзясяткаў кампутараў: як новых, бо мы вядзем і збор грошай, так і ўжываных, але ў добрым стане».
Акцыя працягнецца да 20 сакавіка, але арганізатары спадзяюцца прадоўжыць яе да канца красавіка.
«Спадзяемся, што палякі добра адрэагуюць. Бо мы самі ў часы падполля насуперак камуністам атрымлівалі падобную заходнюю дапамогу, праўда, не ў выглядзе ноўтбукаў, часы былі іншыя. Таму цяпер мы адчуваем маральны абавязак і лічым натуральным дапамагчы братам-беларусам у іх барацьбе», - кажа Ярослаў Владарчык.
Ён прызнае, што даставіць сабраную тэхніку будзе не так лёгка.
«Натуральна, праблема перапраўкі тэхнікі ў Беларусь будзе. Але зноў-ткі, на прыкладзе ваеннага часу ў Польшчы замежнікам атрымлівалася правезці і фарбы, і ксераксы. Таму спадзяюся, што і цяпер будзе як тады. Тэарэтычна - немагчыма, практычна - так!», - кажа ён.
Ярослаў Владарчык запэўніў, што план дастаўкі кампутараў у Беларусь ёсць, але паведамляць яго ў СМІ па вядомых прычынах немэтазгодна.