Рэкорды луканомікі: Траціна сельгаспрадпрыемстваў - банкруты
38
11:33, — Эканоміка
Рост коштаў на сельгаспрадукцыю ў Беларусі тлумачыцца, перш за ўсё, павелічэннем выдаткаў сельгасвытворцаў на энергарэсурсы.
Аб гэтым заявіў сёння на сумесным пасяджэнні палат Нацыянальнага сходу Беларусі намеснік прэм'ер-міністра Валер Іваноў, перадае БелТА.
Віцэ-прэм'ер падкрэсліў, што адной з галоўных прычын, што адмоўна адбіваюцца на эфектыўнасці сельгасвытворчасці, з'яўляецца непарытэт коштаў на прамысловую і сельгаспрадукцыю. «У апошнія гады назіралася падаражэнне імпартуемых у Беларусь энергарэсурсаў, што непазбежна вызначыла павышэнне коштаў на выкарыстоўваныя ў сельскай гаспадарцы тэхнічныя сродкі, у першую чаргу паліва», - сказаў Валер Іваноў. За пяць апошніх гадоў кошты на мінеральныя ўгнаенні выраслі больш чым у 2,5 разы, на газ і электраэнергію - у 4 разы, на гаручае - у 2 разы. «Тэмпы росту коштаў на рэалізаваную сельгаспрадукцыю, на прампрадукцыі і паслугі сельскай гаспадаркі на працягу гэтага перыяду былі рознымі. Індэкс коштавага парытэту ў розныя гады вагаўся ад 90 да 106%, - праінфармаваў віцэ-прэм'ер. - Таму рост коштаў на прадукцыю сельгасвытворчасці тлумачыцца ў першую чаргу ростам выдаткаў на энергаскладнік». З прычыны неэфектыўнага міжгаліновага абмену сельская гаспадарка за перыяд з 1991 па 2010 год панесла страты ў суме $67 млрд., у тым ліку за апошнія пяць гадоў - $34 млрд. Да ліку важкіх прычын, якія стрымліваюць развіццё АПК, адносіцца павольнае структурнае пераўтварэнне аграрнага сектара, недастатковае прыцягненне прамых замежных інвестыцый.
Складаным застаецца фінансавае становішча сельскіх гаспадарак. На 1 студзеня 2011 года неплацежаздольнымі былі больш за 30% сельгасарганізацый. Іхнія фінансавыя абавязацельствы склалі Br26, 9 трлн.
«Усё гэта патрабуе далейшага ўдасканалення аграрнай палітыкі, якая б вызначыла перспектывы развіцця АПК не толькі на бліжэйшыя пяць гадоў, але і на больш аддаленую перспектыву», - сказаў Валер Іваноў.
Напісаць каментар (38)
Навіны
па тэме
Экспарт
Новости партнеров
