Улады ЕЗ абмяркуюць стварэнне адзінага Мінфіна

Еўразоне неабходна стварыць уласнае міністэрства фінансаў з асобным бюджэтам і магчымасцю прыцягваць сродкі на фінансавых рынках.

Гэта неабходна для таго, каб падтрымліваць праблемныя з пункту гледжання фінансавага становішча краіны, прыводзіць газета Financial Times вытрымкі з дакладу вядучых інстытутаў Еўрапейскага звяза (ЕЗ).

Паводле дакладу, падрыхтаванага ЕЗ пры ўдзеле Еўрапейскай камісіі, Еўрапейскага цэнтральнага банка і Еўрагрупы, сродкі з новага бюджэту могуць быць выкарыстаны ў дадатак да нацыянальных схем па скарачэнні беспрацоўя і праграм перападрыхтоўкі кадраў, піша «Інтэрфакс»..

Акрамя новых дэталяў адносна бюджэту еўразоны, у дакуменце гаворыцца аб сістэме эканамічных пагадненняў, якія абавяжуць краіны валютнага блока праводзіць рэформы аналагічныя тым, рэалізацыя якіх у цяперашні час патрабуецца толькі ад краін, якія атрымалі фінансавую дапамогу.

Ужо дзесяць гадоў дыпламаты імкнуцца надзяліць еўразону тымі паўнамоцтвамі, якія звычайна асацыююцца з нацыянальнымі дзяржавамі, і змяніць структуру ЕЗ так, каб яна адказвала ўнутраным рэаліям еўразоны і за яе межамі. Як адзначае FT, выказаныя ў дакладзе ідэі афармляюць гэтыя памкненні.

«Калі мы рэалізуем гэтыя палажэнні, мы будзем у некаторых адносінах больш інтэграванымі, чым Злучаныя Штаты Амерыкі», - адзначыла адна з высокапастаўленых крыніц газеты, якая ўдзельнічала ў стварэнні дакумента, які будзе абмяркоўвацца на саміце ЕЗ 18-19 кастрычніка.

Прапановы ўлад ЕЗ, нягледзячы на сваю амбітнасць, зыходзяць з рэальнай сітуацыі і не прадугледжваюць парушэнне ўстаноўленых у Германіі абмежаванняў. Так, дакумент не апраўдвае надзей палітычных лідэраў некаторых краін - у прыватнасці прэзідэнта Францыі Франсуа Аланда і прэм'ера Італіі Марыё Монці - на стварэнне так званых «еўрабондаў» у рамках бюджэтнага саюза.