Мікалай Дземідзенка: Гайдукевіч выкручваецца

Былы начальнік Фрунзенскага РУУС ведаў аб усіх затрыманых апазіцыянерах, лічыць маладафронтавец.

«У Алега Гайдукевіча раптам «знікла памяць». Ён хоча стварыць вакол сябе арэол быццам бы «палітыка». Мы публікавалі спісы ўсіх палітычных, якія праходзілі праз Фрунзенскаі РУУС. Я таксама там быў. І Гайдукевіч быў у курсе ўсіх фальсіфікацый пратаколаў, ведаў пра затрыманых апазіцыянераў. Цяпер ён проста выкручваецца», - распавёў сайту charter97.org намеснік старшыні «Маладога фронту» Мікалай Дземідзенка, каментуючы заяву былога начальніка Фрунзенскага РУУС Алега Гайдукевіча, што той «не памятае» пра затрыманні апазіцыянераў.

Па словах Мікалая Дземідзенкі, Гайдукевіч ускосна пацвердзіў злачынствы Дзінаса Лінкуса. «Тое, што Гайдукевіч заявіў, што ён «сваіх ніколі не здае», сведчыць аб тым, што Дзінас Лінкус вельмі непразрыстая асоба. Алег Гайдукевіч не назваў яго выдатным калегам, невінаватым і гэтак далей. Гэтая тэма для яго вельмі нязручная, таму ён не хоча ўступаць у дыскусіі, а абыходзіць гэтае пытанне. На маю думку, Гайдукевіч такі ж чалавек, як і Лінкус».

Нагадаем, былы начальнік Фрунзенскага РУУС, а цяпер намеснік старшыні Ліберальна-дэмакратычнай партыі (ЛДП) Алег Гайдукевіч адказаў на пытанні, якія яму раней задалі сябры «Маладога фронту». Так, Гайдукевіч заявіў, што «не памятае» пра затрыманні апазіцыянераў. Таксама ён прызнаўся, што «сваіх ніколі не здае», таму працягвае мець зносіны з Дзінасам Лінкусам. Раней Лінкус быў прысуджаны да 4 гадоў калоніі ўзмоцненага рэжыму за збіццё начальніка Шчучынскага раённага аддзела дэпартамента аховы Аляксея Сяргея.

Тыдзень таму маладафронтаўцы звярнуліся да былога начальніка Фрунзенскага РУУС. Яны прапанавалі Алегу Гайдукевічу папрасіць прабачэння ў тых актывістаў апазіцыі, якіх незаконна затрымлівалі яго падначаленыя і спыталі аб адносінах з садыстам Лінкусам.