Два беларусы загінулі ў ДТЗ у Маскве

У Маскве аўтамабіль да смерці збіў 2 пешаходаў. Ад атрыманых траўм двое мужчын памерлі на месцы, вінаваты ў аварыі практычна не пацярпеў.

ДТЗ адбылося ўвечары 28 кастрычніка на паўночным захадзе Масквы на Валакаламскай шашы, паведамляе Life News.

Па папярэдніх дадзеных, двое мужчын перабягалі дарогу ў неўстаноўленым месцы і трапілі пад колы аўтамабіля. Вадзіцель «хонды акорд» спрабаваў затармазіць, але з-за слізкай дарогі праехаў некалькі дзесяткаў метраў наперад.

- Пацярпелыя - ураджэнцы Беларусі 37 і 35 гадоў - памерлі на месцы ад атрыманых траўм, - пракаментавала крыніца ў праваахоўных органах. - 23-гадовы кіроўца інамаркі Мікалай Астафечук практычна не пацярпеў.

Раней шэраг расейскіх СМІ паведамляў, што мужчыны пераходзілі дарогу па «зебры». Пакуль невядома, з якой мэтай грамадзяне Беларусі прыбылі ў Маскву, аднак у паліцыі не выключаюць, што двое загінулых былі гастарбайтэрамі.