Новае НЗ на будаўніцтве варшаўскага метро (Фота, відэа)

5.10.2012, 16:12

У цэнтры Варшавы, на скрыжаванні вуліц Свентакшыска і Школьна, у выніку аварыі вадаправода ў раёне будаўніцтва другой лініі метро, абрынулася праезная частка вуліцы.

Уцечку вады з вадаправода будаўнікі заўважылі каля 4 гадзін раніцы, а каля 6 гадзін вада падмыла тратуар і праезную частку на вуліцы Школьнай. У бліжэйшых дамах жыхары выявілі невялікія расколіны.

Спецыялісты пакуль не бяруцца сказаць, што паслужыла прычынай аварыі, з-за якой неабходна было эвакуяваць каля 100 чалавек. Паколькі ў раёне аварыі чутны быў пах газу, была часова спыненая падача газу і вады ў бліжэйшыя дамы. Польскія службы хутка справіліся з ліквідацыяй аварыі. Грунт быў хутка замацаваны бетонам, вадаправод і газаправод правяраюцца.

Асцерагаючыся новых правалаў на праезнай часткі, паліцыя перакрыла рух на найблізкай гарадской магістралі - вуліцы Маршалкаўскай. Таксама перакрытыя суседнія вуліцы, а для транспарту пазначаныя маршруты аб'езду. Аднак у цэнтры Варшавы ўтварыліся велізарныя заторы, прыйшлося нават адмяніць некаторыя маршруты грамадскага транспарту.

Гэта не першае НЗ у раёне будаўніцтва варшаўскага метро. У сярэдзіне жніўня пры працы пад зямлёй непадалёк ад Віслы будаўнікі натыкнуліся на так званы плывун - насычаны вадой грунт. З-за небяспекі абвальвання праезнай часткі давялося закрыць рух у аўтамабільным тунэлі, які праходзіць уздоўж ракі, і замарозіць будаўніцтва на гэтым участку. Як лічаць эксперты, ліквідацыя наступстваў гэтай аварыі можа працягнуцца ад некалькіх месяцаў да года. Фірма, якая будуе другую лінію метро, толькі пасля гэтай аварыі звярнулася за дапамогай да геолагаў.

Каля месяца таму ў гэтым жа раёне, што і сёння, таксама давялося эвакуяваць жыхароў і работнікаў фірм размешчаных у бліжэйшых будынках, у тым ліку супрацоўнікаў з галаўнога офіса Народнага банка Польшчы і Польскага грамадскага тэлебачання - усяго каля 3 тысяч чалавек. Аднак тады прычынай паслужыла знойдзеная будаўнікамі метро двухтонная бомба часоў Другой сусветнай вайны.