«Палатачнік» Самасейка абразіў амбасадара Польшчы

«Дэпутат» Мікалай Самасейка абвінаваціў Лешака Шарэпку ў «дэмагогіі» і «рэваншызме»

Ацэньваючы выказванні кіраўніка польскай дыпмісіі ў Беларусі, ён адзначыў: «Міжволі складваецца ўражанне, што польская мара аб рэваншы на Усходзе да гэтага часу з'яўляецца актуальнай тэмай для польскіх элітаў, а сам спадар амбасадар забыў аб прынцыпах і правілах знаходжання дыпламатычнага прадстаўніка ў краіне знаходжання», піша «Менская праўда».

Каментуючы канкрэтныя заявы амбасадара, Мікалай Самасейка сказаў: «У выказванні Лешака Шарэпкі аб тым, што ён не бачыць падвойных стандартаў пры ацэнцы непрапарцыйнага прымянення сілы падчас разгону дэманстрацыі ў Польшчы, класічна выявілася менавіта палітыка падвойных стандартаў. Мабыць, спадар амбасадар, практыкуючыся ў дэмагогіі , дзейнічае па прынцыпе: што дазволена Юпітэру, не дазволена быку».

Не забыўся «дэпутат» і выказацца з нагоды слоў амбасадара аб тым, што Польшча не фінансуе апазіцыю Беларусі.

«Спадар Шарэпка забыўся згадаць пра тое, што рэальнымі атрымальнікамі пераважнай долі заходніх грантаў з'яўляюцца менавіта прадстаўнікі апазіцыі, якія і распараджаюцца імі па сваім меркаванні, мабыць, лічачы сябе разам са спадаром амбасадарам годнымі прадстаўнікамі грамадзянскай супольнасці», - адзначыў «дэпутат».

Нагадаем, што ўчора падчас прэс-канферэнцыі амбасадар Польшчы заклікаў вызваліць і рэабілітаваць палітвязняў.