Павел Севярынец: За вандалізмам у Курапатах стаяць спецслужбы
16- 3.12.2012, 21:47
Правакацыі са знікненнем крыжа польскім афіцэрам інспіраваныя і закліканыя ўбіць клін паміж прадстаўнікамі грамадзянскай супольнасці.
«Курапаты - гэта знакавае месца. Што б там ні адбывалася, яно адгукаецца. Таму той, хто свядома гэта робіць, б'е, як кажуць, у болевую кропку. Мне здаецца, што за гэтым могуць стаяць і спецслужбы, для якіх важна распаліць канфлікты ўнутры грамадзянскай супольнасці. Спыніць вандалізм можна - трэба ўсталяваць кругласуткавую варту ў Курапатах. У свой час актывісты «Маладога фронту» ды іншых арганізацый 8 месяцаў трымалі гэтую бестэрміновую вахту: хлопцы дзяжурылі цэлыя суткі», - сказаў палітык.
Чарговы акт вандалізму адбыўся ва ўрочышчы Курапаты мінулай ноччу. Другі раз невядомымі быў знішчаны знак, усталяваны ў памяць аб афіцэрах Войска Польскага, рэпрэсаваных у Беларусі, нагадвае «Радыё Рацыя».
Да вясны 2013 года памятны знак ва ўрочышчы Курапаты аднаўляць не плануюць. Пра гэта заявіў кіраўнік рады менскага аддзялення міжнароднага таварыства «Мемарыял» Уладзімір Раманоўскі.
Першы крыж у памяць аб расстраляных афіцэраў Войска Польскага быў усталяваны ў Курапатах 29 кастрычніка і знік на наступны дзень. Аб знікненні другога памятнага знака стала вядома ўвечары 2 снежня.