Міліцыянт са «справы Канавалава» асуджаны на тры гады

Міліцыянта, які не ўзяў адбіткі пальцаў у Канавалава, асудзілі на тры гады.

Руслан Сініцын раней займаўся «тэлефоннымі тэрарыстамі». Суд над міліцыянтамі праводзілі ў закрытым рэжыме са спасылкай на дзяржаўныя сакрэты, якія нібыта ўтрымліваюцца ў матэрыялах справы.

У Віцебскім абласным судзе «Нашай Ніве» паведамілі, што супрацоўнік УУС аблвыканкама Руслан Сініцын прызнаны вінаватым у службовай халатнасці.

Ён асуджаны на 3 гады пазбаўлення волі з адбываннем пакарання ў выпраўленчай калоніі ва ўмовах пасялення.

Сініцын таксама пазбаўлены права займаць пасады, звязаныя з праходжаннем службы ў органах унутраных спраў, тэрмінам на 5 гадоў і права займацца экспертна-крыміналістычнай дзейнасцю тэрмінам на 5 гадоў.

Нагадаем, крымінальная справа ў дачыненні да Сініцына была ўзбуджаная па арт. 428 КК («Службовая халатнасць»). Міліцыянт не ўзяў у 2009 годзе адбіткі пальцаў у прызыўніка Дзмітрыя Канавалава, якога ў мінулым годзе прызналі вінаватым у здзяйсненні выбухаў у Менску і Віцебску.

Эксперт не толькі не правёў дактыласкапію, але і выдаў маладому чалавеку даведку аб тым, што той прайшоў такую ​​працэдуру раней.

І такім чынам прызыўнік не быў правераны на дачыненне да выбуху ў Менску 4 ліпеня 2008 года.

Паводле матэрыялаў крымінальнай справы, менавіта адбіткі пальцаў Дзмітрыя Канавалава былі выяўленыя на выбуховай прыладзе, якая не спрацавала ў 2008-м.

Згодна з арт. 428 КК Руслану Сініцыну пагражала пакаранне ў выглядзе абмежавання або пазбаўлення волі на тэрмін да пяці гадоў з пазбаўленнем права займаць пэўныя пасады.

Суд над міліцыянтамі праводзілі ў закрытым рэжымеса спасылкай на дзяржаўныя сакрэты, якія нібыта ўтрымліваюцца ў матэрыялах справы.

Руслан Сініцын - выпускнік Менскага вышэйшага авіяцыйнага каледжа. Да прыходу ў міліцыю працаваў у грамадзянскай авіяцыі. Працаваў экспертам фонаскапічнай лабараторыі экспертна-крыміналістычнага цэнтра УУС аблвыканкама. Займаўся вылічэннем «тэлефонных тэрарыстаў». Потым праводзіў дактыласкапію.