У Менск прыбыў прадстаўнік Еўракамісіі Гунар Віганд

У Беларусі з працоўным візітам знаходзіцца кіраўнік дэпартамента Еўрапейскай службы знешніх дзеянняў Гунар Віганд.

Ён прыбыў у Менск 8 лютага.

Як паведамілі БелаПАН у прадстаўніцтве Еўразвяза ў Беларусі, галоўная мэта візіту - «усталяваць еўрапейскі дыялог па пытаннях мадэрнізацыі з прадстаўнікамі грамадзянскай супольнасці і палітычнай апазіцыі».

Віганд плануе сустрэнецца з беларускімі праваабаронцамі, роднымі палітвязняў, супрацоўнікамі дыпламатычнага корпуса і з прадстаўнікамі ўрада. Гэта дасць магчымасць «зрабіць агляд цяперашняга ўзроўню адносінаў паміж ЕЗ і Беларуссю і агучыць пытанні, якія выклікаюць занепакоенасць у ЕЗ», адзначылі ў прэс-службе прадстаўніцтва.

«ЕЗ ставіць на мэце падтрымаць будучае пераўтварэнне Беларусі ў краіну, дзе пераважаюць дэмакратыя, вяршэнства права і павага правоў чалавекі. ЕЗ працягвае працаваць з тымі, хто падзяляе гэтыя імкненні, - падкрэслівае прэс-служба. - ЕЗ, як і раней, імкнецца звяртацца да ўсіх беларусаў і выступае за аб'яднаны падыход да намаганняў, накіраваных на трансфармацыю і мадэрнізацыю. Еўразвяз узаемадзейнічае з беларускай грамадзянскай супольнасцю ў абмеркаванні патэнцыялу еўрапейскай будучыні для краіны».

У прадстаўніцтве ЕЗ адзначаюць: існуе шмат галін, у якіх Еўразвяз ужо дапамагае або можа аказаць дапамогу Беларусі, у тым ліку ў межах Еўрапейскай палітыкі суседства і Усходняга партнёрства.

«Ёсць план дзеянняў па правядзенні рэформаў. Ёсць патэнцыял эканамічнай інтэграцыі, інвестыцый і падтрымкі эканамічнага развіцця краіны, магчымасць узмацніць супрацоўніцтва з Еўрапейскім банкам рэканструкцыі і развіцця, Еўрапейскім інвестыцыйным банкам, існуе магчымасць макраэканамічнай дапамогі з боку ЕЗ», - адзначае прэс-служба.

«Але ёсць умовы, выкананне якіх неабходнае для таго, каб гэтымі магчымасцямі можна было скарыстацца, - падкрэсліваюць у прадстаўніцтве. - ЕЗ працягне актыўна супрацоўнічаць з беларускай грамадзянскай супольнасцю і імкнуцца да таго, каб пазначыць ключавыя рэформы, якія неабходныя для таго, каб паўсталі магчымасці для падтрымкі».

Візіту Гунара Віганда працягнецца да 10 лютага.