«Гавары праўду»: Гэта татальны ідыятызм

Пасля вынясення прысуду Андрэю Дзмітрыеву і Міхаілу Пашкевічу кіраўніцтва грамадзянскай кампаніі «Гавары праўду!» распаўсюдзіла заяву.

У ёй кампанія адзначае: рашэнне суда прадыктаванае жаданнем уладаў адпомсціць актывістам за іхнюю дзейнасць па папулярызацыі ідэй «Грамадзянскай дамовы».

Адным з крокаў па рэалізацыі «дамовы» стала дапамога, аказаная «Гавары праўду!» сябрамі садовых таварыстваў і жыхарамі вёсак Смалявіцкага раёна, матэрыяльныя інтарэсы якіх маглі быць незаконна ўшчэмленыя пры будаўніцтве ў раёне Кітайска-Беларускага тэхнапарку.

- Мы разглядаем гэты прысуд як несправядлівы і незаконны, - адзначаюць аўтары звароту. - Суд выканаў палітычную замову. Ім не прынята пад увагу, што сходы сябраў садовага таварыства рэгламентуюцца іншымі нарматыўнымі актамі, а не Законам Рэспублікі Беларусь «Аб масавых мерапрыемствах», а таксама не ўлічыў, што Андрэй Дзмітрыеў і Міхаіл Пашкевіч не з'яўляліся і не маглі з'яўляцца арганізатарамі сходу паводле Статута садовага таварыства .

Кіраўніцтва «Гавары праўду!» заяўляе, што і далей будзе прытрымлівацца духу і літары «Грамадзянскай дамовы» і працягне дзейнасць па абароне інтарэсаў нашых суграмадзянаў, нягледзячы на ​​актыўнае супрацьдзеянне ўладаў і запалохванне нашых таварышаў.

- Мы выказваем падтрымку нашаму таварышу, актывісту «Гавары праўду!» Ігару Сімбірову, незаконна затрыманаму міліцыяй за ўдзел у канцэрце бардаўскай песні. Людзей у нашай краіне арыштоўваюць ужо не толькі за тое, што яны гавораць, але і за тое, што яны спяваюць. Краіна ўсё бліжэй не толькі да татальнага беззаконня, хлусні і подласці, але і да татальнага ідыятызму. Мы будзем супрацьстаяць гэтаму ўсімі нашымі сіламі і магчымасцямі. Патрабуем ад уладаў спыніць пераслед актывістаў грамадзянскай кампаніі, - рэзюмуюць падпісанты звароту кіраўнік грамадзянскай кампаніі «Гавары праўду!» Уладзімір Някляеў, Аляксандр Фядута, Сяргей Вазняк і Павел Вінаградаў.