Шакуцін хоча набыць акцый «Амкадора» на 500 тысяч даляраў

Старшыня савета дырэктараў ААТ «Амкадор» хоча выкупіць 40 тысяч акцый ААТ «Амкадор» па 100 тысяч рублёў за штуку.

Прапанова аб набыцці акцый прадпрыемства з'явілася на сайце Беларускай валютна-фондавай біржы.

Згодна з заяўкай, патэнцыйны пакупнік Шакуцін Аляксандр Васільевіч, г. Менск, вул. К. Чорнага, д. 31, кв. 63 (тэл. 280-29-99) праз брокера ЗАТ «БРОСТОК» мае намер набыць 40 тысяч акцый ААТ «Амкадор» па мінімальным кошце 100 000 рублёў. Тэрмін аплаты акцый: не пазней за дзень, якi iдзе за днём заключэння ўгоды на ААТ «БВФБ». Форма і парадак аплаты акцый: безнаяўнае пералічэнне грашовых сродкаў у адпаведнасці з правіламі заключэння ўгод на ААТ «Беларуская валютна-фондавая біржа». Дата пачатку тэрміну набыцця акцый: 5 ліпеня 2012 года. Дата заканчэння тэрміну набыцця акцый: 1 кастрычніка 2012 года.

Аляксандр Шакуцін - уладальнік другога па велічыні пакета акцый ААТ «Амкадор». Бізнесмэн уваходзіць у бліжэйшае кола беларускага кіраўніка, з'яўляецца сябрам «савету рэспублікі», яго называюць адным з «кашалькоў» сям'і Лукашэнкі. Кантрольны пакет (каля 60%) акцый холдынгу належыць ганароваму консулу Непала ў Беларусі Упендра Махата.

Прадпрыемства «Амкадор» заснаванае ў 1927 годзе, пераўтворанае ў ААТ у 1991 годзе. 70% акцый прадпрыемства належыць юрыдычным асобам, 15% - дзяржаве, 14,9% - фізічным асобам.

Як паведамлялася раней, ААТ «Амкадор» плануе правесці IPO у 2014 годзе. Пра гэта ў маі 2012 заявіў генеральны дырэктар прадпрыемства Валер Кандратчык на прэс-канферэнцыі, паведамляла агенцтва ІТАР-ТАСС. Паводле яго, сёння прадпрыемства гатовае размясціць на IPO 15% акцый, у выніку чаго плануецца прыцягнуць 70-80 мільёнаў даляраў.