Жыхары Якімавай Слабады сустракалі Пашкевіча на волі (Фота)

Актывіст «Гавары праўду» Міхаіл Пашкевіч выйшаў з ізалятара Светлагорскага РАУС пасля сямі сутак арышту.

Актывіста выпусцілі своечасова, паведамляе прэс-служба «Гавары праўду».

Міхаіла Пашкевіча сустракалі жыхары вёскі Якімава Слабада, якія разам з «Гавары праўду» змагаюцца супраць будаўніцтва завода па вытворчасці беленай цэлюлозы, а таксама актывісты кампаніі з Светлагорска, Рэчыцы, Гомеля і Менска.

Як раней паведамляў сайт charter97.org, 1 чэрвеня Светлагорскі суд прысудзіў Міхаіла Пашкевіча да 7 сутак адміністрацыйнага арышту за «ўмяшанне ў дзеянні міліцыі». Судовы працэс прайшоў без прысутнасці адваката з Менску.

Пашкевіч быў затрыманы 31 мая міліцыяй Светлагорскага раёна разам з іншымі актывістамі кампаніі «Гавары праўду» і журналістамі, якія прыехалі ў вёску Якімава Слабада, каб назіраць за сходам жыхароў, якія хочуць арганізаваць мясцовы рэферэндум з нагоды будаўніцтва ў іхняй мясцовасці завода беленай цэлюлозы.