Дэлегацыя ЗША гатова байкатаваць Ярмошыну

Амбасадар ЗША ў АБСЕ Іэн Кэлі выступіў 12 ліпеня на пасяджэнні Пастаяннага савета ў Вене.

Прыводзім тэкст заявы амерыканскага дыпламата, які паступіў у рэдакцыю charter97.org.

«Злучаныя Штаты па-ранейшаму глыбока занепакоены сур'ёзнымі парушэннямі Беларуссю сваіх абавязацельстваў АБСЕ ў галіне павагі праў чалавека, асноўных свабод і вяршэнства закона.

Хоць журналіст Анджэй Пачобут быў вызвалены да суда, мы лічым, што яго арышт па абвінавачванні ў «паклёпе на прэзідэнта» быў палітычна матываваным і што ўмовы, накладзеныя на яго вызваленне, прызначаны для далейшага абмежавання яго здольнасці ажыццяўляць свае правы чалавека. Больш за тое, у апошнія дні быў праведзены ператрус у офісе Саюза палякаў з канфіскацыяй абсталявання, як мяркуецца, звязанага са справай г-на Пачобута.

Акрамя таго, мы нядаўна былі сведкамі арышту, затрымання і вызвалення журналіста Паўла Свярдлова з Еўрапейскага радыё для Беларусі, абвінавачанага ў «нецэнзурнай лаянцы». Відавочна, што такія арышты і кароткатэрміновыя затрыманні становяцца ўсё больш распаўсюджаным сродкам для падаўлення іншадумства ў Беларусі.

Мы па-ранейшаму глыбока заклапочаны станам палітвязняў у Беларусі. Раней мы ўжо ўздымалі пытанне аб узмацненні жорсткасці абмежаванняў у дачыненні да Алеся Бяляцкага, і мы занепакоены судовым загадам ад 4 ліпеня па захопу офіса праваабарончага цэнтра «Вясна». Памяшканне, пра якое ідзе гаворка, служыць не толькі офісам цэнтра, але таксама і прыватнай рэзідэнцыяй жонкі г-на Бяляцкага, Наталлі Пінчук.

Беларусь, якая ўжо ўвяла абмежаванні на паездкі прадстаўнікоў апазіцыі і актывістаў у галіне праў чалавека, нядаўна зрабіла яшчэ адзін крок па абмежаванню асноўнай свабоды перамяшчэння - права пакідаць сваю краіну і вяртацца ў яе. Мы па-ранейшаму занепакоены бягучымі і прапанаванымі заканадаўчымі актамі, такімі як указ № 295, апублікаваны 4 ліпеня, які дазваляе КДБ ўключаць грамадзян у спіс асобаў, якім забаронены паездкі, і шырока разглядаецца як інструмент для далейшага прыгнечання іншадумства.

У сувязі з гэтым мы глыбока занепакоены навінамі, якія паступілі сёння раніцай з Беларусі, аб тым, што ўлады адмаўляюць Віктару Карніенку, сустаршыні ініцыятывы «За справядлівыя выбары», у праве здзейсніць паездку ў Вену для ўдзелу ў Дадатковым нарадзе па чалавечым вымярэнні, які праходзіць на гэтым тыдні. Гэта абмежаванне свабоды перамяшчэння г-на Карніенкі парушае жыццёва важны прынцып Хельсінкі і ставіць пад пытанне шчырасць Беларусі і яе прыхільнасць асноўным прынцыпам нашай арганізацыі.

Злучаныя Штаты вымушаны пратэставаць супраць гэтага чарговага ігнаравання Беларуссю асноўных свабодаў. У выніку гэтага, пакуль г-ну Карніенка будуць адмаўляць у яго праве на свабоду перамяшчэння і ўдзел у нашай сустрэчы, ні я, ні мае старэйшыя супрацоўнікі не будуць у ёй удзельнічаць.

Мы задаволены рашэннем Савета ААН па правах чалавека прызначыць спецыяльнага дакладчыка па Беларусі, якое Злучаныя Штаты актыўна падтрымалі. Мы заклікаем урад краіны ў цяперашні час у поўнай меры супрацоўнічаць са спецыяльным дакладчыкам ААН і ўсімі спецыяльнымі працэдурамі ААН.

Мы зноў заклікаем Беларусь неадкладна і безумоўна вызваліць усіх палітвязняў, забяспечыць поўнае аднаўленне іх палітычных і грамадзянскіх праў і спыніць пераслед палітычных актывістаў, прадстаўнікоў грамадзянскай супольнасці, змагароў за правы чалавека і незалежных журналістаў».