Памыцца ў лазні стала даражэй

Традыцыйнае абурэнне менчукоў такімі ж традыцыйнымі летнімі прафілактычнымі адключэннямі гарачай вады можа атрымаць яшчэ адзін аргумент.

Нібы на злосць гараджанам менавіта ў гэты перыяд гарадскія ўлады вырашылі падняць цэны на паслугі грамадскіх лазняў, піша TUT.by.

Новыя тарыфы ўстаноўлены Дэкларацыяй № 47 Упраўлення антыманапольнай і цэнавай палітыкі Менгарвыканкама яшчэ 17 ліпеня, а ўжо 19 чысла КУП «Гарадскія лазні» зацвердзіла іх сваім загадам № 304. У сілу ён уступіў сёння, 20 ліпеня.

З гэтага часу наведаць лазню, умяшчальнасцю да 20 чалавек, абыдзецца менчуку ў 22 000 рублёў. Калі ва ўстанове змяшчаецца звыш 20 чалавек, то паслуга абыдзецца танней - у 19 000. Ледзь менш прыйдзецца выкласці за карыстанне душавой кабінкай - 18 000 рублёў. І, нарэшце, варыянт для самых эканомных: памыцца ў агульным аддзяленні без парнай будзе каштаваць 10 300 рублёў.

У сярэднім менчукам прыйдзецца плаціць за наведванне лазні прыкладна на 3 тысячы рублёў даражэй, чым раней. Нагадаем, не так даўно ў сталіцы вырашылі адмовіцца ад будаўніцтва новых і рэканструкцыі старых лазняў у сувязі з іх нізкай рэнтабельнасцю.

Павешанне коштаў датычыцца толькі муніцыпальных лазняў, якія знаходзяцца ў падпарадкаванні гарадскіх улад. Прыватныя памывачныя ўстановы ўстанаўліваюць тарыфы на свае паслугі самастойна.