Дзяўчына Башарымава: «Мяне суткі пратрымалі ў «амерыканцы»
110
0:08, — Палітыка
Сяброўку рыэлтара, які здаў кватэру дырэктару шведскай Studio Total, адпусцілі пасля допыту.
«Еўрарадыё» раскрывае новыя акалічнасці гучнай справы.
"Мы з Сяргеем больш за год ужо знаёмыя. Сябры пазнаёмілі нас. Ён некалькі гадоў ужо займаецца здачай кватэр на суткі. У яго чатыры кватэры, наколькі я ведаю. І вось праз агульных знаёмых мы пачалі сустракацца з ім", ― распавядае Ірына Лагойка пра сваё знаёмства з Сяргеем Башарымавым.
Зараз гэта адзін з самых вядомых у інтэрнэце мінскіх рыэлтараў. А ўсё праз гісторыю з "цацачным дэсантам". Менавіта Башарымаў у траўні здаў кватэру дырэктару шведскай Studio Total Пітэру Кромвэлу. Збіраўся здаваць і 3 ліпеня. Аднак той да яго не даехаў і выслаў некалькі смсак з адмовай ад кватэры на Карла Маркса. Для беларускіх чэкістаў гэтага было дастаткова, каб абвінаваціць Сяргея Башарымава ў спрыянні нелегальнаму перасячэнню мяжы групай асобаў і змясціць яго пад варту. А разам з ім і дзяўчыну Сяргея ― Ірыну.
"За мной прыйшлі 6-га ліпеня ўвечары. Каля 7-й гадзіны. Прадставіліся супрацоўнікамі КДБ. Сяргея прыкладна адначасова са мной забралі, ён па працы на кватэру ехаў… Яны мне сказалі, што трэба праехаць з імі, каб даць тлумачэнні. Без аніякіх варыянтаў. Прывезлі і пасадзілі ў камеру. Допыты былі і 6-га, і на наступны дзень", ― Ірына расказвае пра сваё затрыманне спакойна, амаль як пра цікавую прыгоду. Але прызнаецца, што у вузкай камеры "амерыканкі" было зусім не весела.
На наступны дзень яе адпусцілі са словамі "пашанцавала табе, што дзяўчына". Вярнуўшыся дадому Ірына не знайшла свайго ноўтбука. Зніклі таксама флэшкі і знешні вінчэсцер. Усё забралі чэкісты, пакуль яна была на допыце.
Расказаць пра свае гутаркі з супрацоўнікамі КДБ Ірына не можа – абавязвае таямніца справы. Дзяўчына гаворыць, што спадзявалася пабачыць Сяргея спачатку пасля 3 сутак затрымання, потым праз 10. Але марна. Калі пабачыла у інтэрнэце, што затрыманы яшчэ і фатограф Сурапін – вырашыла расказаць пра свайго хлопца журналістам.
"Яго праца ― здаваць кватэры. Я нават не ведаю, каму ён іх здаваў. Ці былі там нейкія замежнікі… У КДБ мне гаварылі: "Ты яго дзяўчына, ты мусіш ведаць". Але я абсалютна нічога не ведала, зусім. Я нават пра шведскі самалёт і гэтых мядзведзікаў даведалася толькі пасля таго, як была затрыманая. Гэта нейкі абсурд", ― распавядае Ірына.
Праз 10 сутак затрымання Сяргей Башарымаў з падазраваных ператварыўся ў абвінавачаныя. Яму закідаюць саўдзел у парушэнні мяжы групай асобаў. За гэта рыэлтару пагражае ад 3 да 7 гадоў. Зараз Ірына разам з маці Сяргея прыкладае ўсе намаганні, каб вызваліць яго. Наймаюць свайго адваката, бо ад дзяржаўнага могуць дабіцца толькі дзяжурнай фразы “супакойцеся, усё будзе добра”. За 14 дзён Сяргею двойчы перадалі вопратку і прадукты. Часцей не дазваляюць.
Ірына поўная рашучасці дамагчыся вызвалення свайго хлопца. "Гэта абсурд, гэта нейкі абсурд", ― усё паўтарае і паўтарае яна.
Як паведамляў charter97.org , супрацоўнікі КДБ раней затрымалі Сяргея Башарымава, у якога шведы збіраліся зняць кватэру, але адмянілі бронь па смс. 20-гадовага Антона Сурапіна затрымалі раніцай 13 ліпеня, ён падазраецца ў дапамаганні незаконнаму перасячэнню мяжы за апублікаванне фатаграфій шведскіх мядзведзяў. Ім абодвум пагражае да 7 гадоў турмы.
4 ліпеня шведскае рэкламнае агенцтва Studio Total паведаміла на сваім сайце аб тым, што правяло акцыю ў падтрымку дэмакратыі ў Беларусі. Шведы на лёгкаматорным самалёце праляцелі ад літоўскай мяжы да Менска і бесперашкодна вярнуліся. Над ускраінай беларускай сталіцы, а таксама над мястэчкам Івянец Валожынскага раёна Менскай вобласці шведскія лётчыкі скінулі 876 плюшавых мішак з прывязанымі да іх улёткамі ў абарону свабоды прэсы ў Беларусі.
Не выключана, што фатаграфіі Антону Сурапіну даслала жыхарка Івянца Кацярына Скурат . Звесткі аб яе магчымым затрыманні КДБ з'явіліся 20 ліпеня.
Напісаць каментар (110)
Навіны
па тэме
- Па справе «мядзведжага дэсанта» арыштаваная 16-гадовая дзяўчына?
- Шведскі «дэсант» мог жыць каля адміністрацыі Лукашэнкі
- Шведскі пілот: Можа яшчэ арыштуюць бармэна, які прадаў нам піва ў Менску?
- Істэрыка КДБ. Яшчэ адзін крайні ў «плюшавай» справе?
Экспарт
Новости партнеров
