Першы
82
17:09, — Палітыка
Аб беларускім Супраціве, нарэшце, знялі мастацкі фільм.
Неафіцыйны закрыты паказ фільма «Жыве Беларусь!» прайшоў 23 ліпеня ў Варшаве.
«Жыве Беларусь!» здымаўся ў лістападзе-снежні 2011 года ў Польшчы. Трэйлер фільма быў паказаны на Берлінскім кінафэстывалі вясной 2012 года, а прэм'ерны паказ адбыўся на фестывалі ў Канах.
Рэжысёр фільма - паляк Кшыштаф Лукашэвіч. Сцэнарысты - беларускі журналіст і актывіст Франак Вячорка і Кшыштаф Лукашэвіч.
Галоўную ролю - рок-музыкі Мірона Захаркі - выканаў беларускі музыка Зміцер (Вінсэнт) Папко. Фільм зняты на рэальных падзеях і сабраў у сабе гісторыі і лёсы многіх беларусаў, якія прайшлі і працягваюць праходзіць праз рэпрэсіі ў Беларусі.
Сайт charter97.org папрасіў падзяліцца меркаваннем ад прагляду фільма ўдзельнікаў закрытага паказу ў Варшаве.
Зміцер Бандарэнка, былы палітвязень, каардынатар грамадзянскай кампаніі «Еўрапейская Беларусь»:
«Гэта фільм, які шмат па якім параметрам заслугоўвае эпітэта «першы». Першы фільм пра Беларусь, першы фільм па-беларуску і першы фільм пра беларускае змаганне. Для соцен тысяч беларусаў змаганне за свабоду і незалежнасць стала сэнсам жыцця, а дагэтуль яшчэ ніколі ў кіно галоўная тэма нашага жыцця не гучала. У кожным фільме можна знайсці недасканаласці, але і войска, і турмы, і Плошча паказаныя вельмі праўдзіва. І суперважна, што фільм выйдзе менавіта зараз, калі ў беларускім грамадстве інтэнсіўна абмяркоўваецца пытанне, што рабіць далей».
Наталля Радзіна, галоўны рэдактар charter97.org:
«Фільм-узрушанне, фільм-шок, нават для мяне, якая прайшла ў Беларусі тую ж турму КДБ. Пры гэтым прафесійна зняты, з прафесійнай рэжысурай, таленавітымі акцёрамі, высакаякасным гукам, саўндтрэкамі, якія, упэўнена, стануць хітамі. «Жыве Беларусь» павінен паглядзець кожны беларус. Перш за ўсё - моладзь, каб зразумець: пара дзейнічаць і мяняць жыццё ўжо зараз. Спадзяюся, яго ўбачаць і многія супрацоўнікі КДБ, МУС, Мінабароны, хто сёння займаецца пераследам і знішчэннем іншадумцаў. Паглядзеўшы яго, яны зразумеюць - нішто не забыта, усё фіксуецца і ім давядзецца за ўсё адказваць. Бо, па сутнасці, яны з'яўляюцца сёння ваўкалакамі, якія змагаюцца супраць усяго жывога».
Зміцер (Вінсэнт) Папко, музыка, выканаўца галоўнай ролі:
«Гэта была досыць складаная маральная і фізычная праца. Маральна: таму што ўсе сцэны я прапусьціў праз сябе, і улічваючы ўвесь псыхалягічны драматызм гэтай карціны, часамі было няпроста выйсьці з пэўнага стану, але атрымалася справіцца з гэтым. Фізычна: таму што працавалі фактычна суткамі, з перапынкамі на сон. Усё гэта атрымалася зьдзейсьніць, дзякуючы ўсьведамленьню, што мы робім вялікую справу для агульнай ідэі. Патрабаваліся вялікая канцэнтрацыя і высілкі, каб зрабіць гэты фільм, але дзякуючы прафэсіяналізму ўсёй кінагрупы мы дасягнулі выніку, які варты ўвагі».
Франак Вячорка, сцэнарыст:
«Фільм «Жыве Беларусь!» - зрэз беларускай рэальнасьці. Жорсткі, часам абсурдны, смешны, несправядлівы. У ім уздымаецца комплекс праблемаў: канфлікт пакаленьняў - савецкага і незалежнага маладога, дзьвюхмоўе, забароненыя музыкі і «чорныя сьпісы», катаваньні у засьценках КДБ, каханьне на барыкадах (Дашкевіч-Палажанка), састарэлая і сьмешная армія, у прыватнасьці, войскі супрацьпаветранай абароны, якія ня здольныя адсачыць швэдзкі самалёт зь мядзьведзікамі. Гэта беларускі фільм, зроблены супольна беларусамі і палякамі, з удзелам найлепшых беларускіх артыстаў. Прызначаны для заходняга гледача, але беларусы ў ім таксама знойдуць нешта сваё».
P.S. Прэм'ера фільма ў інтэрнэце, у тым ліку на charter97.org, адбудзецца восенню.
Напісаць каментар (82)
Навіны
па тэме
- На Площади милиция могла перейти на сторону демонстрантов? (Видео)
- Першы трэйлер фільма «Жыве Беларусь» (Відэа)
- Фотарэпартаж: «Жыве Беларусь» у Канах
- У Канах паказалі фільм «Жыве Беларусь»
- Фільм «Жыве Беларусь» пакажуць у Канах
Экспарт
Новости партнеров
