Дыктатар чакае «сірыйскага сцэнара»

Аляксандр Лукашэнка лічыць, што такі сцэнар яму рыхтуюць з-за мяжы.

Дыктатар паставіў перад Узброенымі сіламі і Дзяржпамежкамітэтам РБ задачу забяспечыць свабоднае волевыяўленне грамадзян у спакойнай абстаноўцы і ў строгай адпаведнасці з беларускімі законамі на парламенцкіх выбарах, не дапусціўшы пры гэтым паўтарэння сірыйскага сцэнара.

«Восенню нам трэба будзе правесці чарговыя «парламенцкія выбары». Гэта як раз той момант, калі адбываецца актывізацыя як за межамі краіны, так і ўнутры тых, хто страшна ненавідзіць нашу Беларусь і каму не падабаецца існае становішча спраў. Задача ўсіх тут прысутных забяспечыць магчымасць вольнага волевыяўлення грамадзян у спакойнай абстаноўцы і ў строгай адпаведнасці з беларускімі законамі», - заявіў сёння А.Лукашэнка на нарадзе.

«...Мы жывем у вядомы час», - мудра заўважыў беларускі кіраўнік.

«З'яўленне новых геапалітычных выклікаў, эканамічных і палітычных пагроз бяспекі сталі характэрнымі рысамі сучаснага свету. Ва ўмовах глабалізацыі любыя негатыўныя тэндэнцыі распаўсюджваюцца вельмі хутка, нягледзячы на геаграфічныя межы. Прыкладаў гэтаму дастаткова - гэта сітуацыя на Блізкім Усходзе, у Сірыі, ціск на Іран і іншыя», - растлумачыў Лукашэнка, чым вядомы «вядомы час».

«На змену традыцыйным спосабам вядзення вайны прыходзяць спецыяльныя, у тым ліку інфармацыйна-псіхалагічныя, аперацыі і падрыўныя акцыі. У іх усё часцей задзейнічаюцца добра падрыхтаваныя групы экстрэмісцкай накіраванасці. Пад патранажам шматлікіх арганізацый, фармальна дзеючых пад сцягам распаўсюджвання дэмакратыі, вырошчваюцца, кансалідуюцца і накіроўваюцца ў патрэбнае замежным гаспадарам рэчышча ўнутраныя дэструктыўныя сілы», - працягнуў ён.

«Такія рэаліі вымушаюць кіраўніцтва Беларусі больш пільна сачыць за станам сістэмы забеспячэння нацыянальнай бяспекі і аператыўна прымаць рашэнні па ключавых пытаннях. Гэта асабліва важна ў перыяд правядзення палітычных кампаній, калі найбольш актывізуюцца знешнія і ўнутраныя нядобразычліўцы, мякка кажучы», - рэзюмаваў Лукашэнка.

У сувязі з гэтым, ён запатрабаваў ад міністра абароны далажыць аб бягучым стане спраў беларускага войска.

«Неабходна даць прынцыповую ацэнку, наколькі яго аблічча адказвае патрабаванням сучаснасці, якія маюцца праблемныя пытанні ў яго мадэрнізацыі і развіцці, якія шляхі іх вырашэння найбольш мэтазгодныя ў кантэксце нашых эканамічных магчымасцяў... Канкрэтна быў дадзены шэраг даручэнняў, каб мы пільна паглядзелі на ўжо рэфармаванае некалькі гадоў таму беларускае войска, таму што сітуацыя, мы гэта бачым і па арабскай вясне, і па Сірыі, сёння імгненна змяняецца, і войска павінна быць прыстасавана да гэтай сітуацыі, калі не дай бог што здарыцца», - заявіў Лукашэнка.