Прадпрымальнікаў прымушаюць «купляць беларускае»

Улады патрабуюць павялічыць удзельную вагу беларускай прадукцыі ў агульным аб'ёме тавараабароту да 86%.

Менскія бізнесмены ўжо дзяліліся з лістамі з раённых адміністрацый з нагоды ўпрыгажэння гандлёвых кропак перад 3 ліпеня і правядзення распродажаў, піша «Салiдарнасць».

Не прайшло і тыдня, як уладальнікі крам, у тым ліку і прыватных, атрымалі новыя ўстаноўкі. На гэты раз - вакол «Купляйце беларускае».

«Вам неабходна прыняць дзейсныя меры па павелічэнню ўдзельнай вагі прадукцыі беларускай вытворчасці ў агульным аб'ёме тавараабароту харчовых тавараў да 86%, а таксама забяспечыць рост рознічнага тавараабароту на ўзроўні не менш як 105%», - гаворыцца ў дакуменце.

- Мы, як апынулася, павінны павялічыць аб'ём і ўсё прадаць, - каментуе дакумент прадпрымальнік Уладзімір, уладальнік невялікага магазіна ў адным са сталічных гандлёвых цэнтраў. - Гэта значыць, атрымліваецца, гэта наша віна, калі беларускі тавар не прадаецца. Не вытворцы! Калі так, то, сапраўды, навошта вытворцу павышаць якасць прадукцыі, бо прадпрымальнікаў і гэтак прымусяць тавар прадаць?! ... Хай бы ўжо тады чыноўнікі наўпрост пакупнікам такія пастановы рассылалі ці ж над кожнай гандлёвай кропкай замацавалі таблічкі-звароты: «Пакуль не купіце 10% тавараў беларускай вытворчасці - з крамы не выйдзеце ».

Нагадаем, раней адміністрацыі раёнаў Менска «прасілі» ўладальнікаў прыватных крам і прадпрымальнікаў не толькі ўпрыгожыць да Дня незалежнасці свае плошчы, але таксама зрабіць распродажы і дэгустацыі.