З пачатку года ў Менску звольніліся больш за 90 тысяч чалавек

Афіцыйная статыстыка агучыла невясёлую тэндэнцыю ў сталіцы квітнеючай Беларусі.

Асноўным працэсам на рынку працы ў бягучым годзе застаецца адток кадраў.

У эканоміке горада расце колькасць людзей, якія звальняюцца з прадпрыемстваў, паведамілі карэспандэнту БелТА ў камітэце па працы, занятасці і сацыяльнай абароне Менгарвыканкама.

За студзень-чэрвень бягучага года колькасць звольненых (90,8 тыс. чалавек) на 10,6 тыс. перавысіла колькасць прынятых на працу.

«Асноўным працэсам на рынку працы ў бягучым годзе застаецца адток кадраў», - адзначылі ў камітэце.

Непапаўненне кадраў адзначана ў прамысловасці (77,7%), будаўніцтве (82,2%), транспарце і сувязі (89%), дзяржаўным кіраванні (82,9%), сферы нерухомасці (87,8%), адукацыі (66, 8%), ахове здароўя (92,5%), сферы камунальных паслуг (93,6%).

Колькасць заяўленых свабодных працоўных месцаў у эканоміке сталіцы з пачатку гэтага года ўзрасла на 9,8% і на 1 ліпеня склала 20,1 тыс. вакансій, з іх 75,6% - для рабочых. Найбольшая патрэбнасць у кадрах адзначана ў арганізацыях прамысловасці (4,9 тыс.) і будаўніцтва (4 тыс.), транспарту і сувязі (2,2 тыс.), гандлю (2,1 тыс.), аховы здароўя (1,7 тыс.), сферы нерухомасці (1,8 тыс.).