Таксістаў-нелегалаў будуць пазбаўляць аўто

У Беларусі кіроўцы, якія нелегальна займаюцца прыватным возніцтвам, могуць пазбавіцца аўтамабіля.

Як паведаміла першы намеснік начальніка інспекцыі Міністэрства па падатках і зборах Надзея Болдырава, праблеме нелегальнага возніцтва сёння надаецца вельмі шмат увагі. Так, праводзяцца штодзённыя мерапрыемствы, рэйдавыя праверкі, маніторынг, перадае БелТА.

«Артыкул, за які прыцягваюць фізічную асобу да адміністрацыйнай адказнасці, прадугледжвае магчымасць канфіскацыі транспартнага сродку, і не выключана, што ў бліжэйшы час меры адміністрацыйнай адказнасці будуць больш жорсткімі і ў дачыненні да асоб, якія не ў першы раз трапляюцца, будзе ўжытая канфіскацыя аўтатранспартнага сродку», - заявіла яна.

Надзея Болдырава паведаміла, што пакуль канфіскацыя як від адміністрацыйнай адказнасці па гэтых складах правапарушэнняў не ўжывалася, але праца будзе праводзіцца, і гаспадарчы суд, які выносіць пастанову, таксама ўбачыць неабходнасць прымянення канфіскацыі.

Па дадзеных Надзеі Болдыравай, за студзень-ліпень бягучага года былі выяўленыя 132 фізічныя асобы, якія займаюцца нелегальным прыватным возніцтвам. У дачыненні да 82 з іх вынесены папярэджанні, у дачыненні да астатніх складзены адміністрацыйныя пратаколы. Агульная сума адміністрацыйнага штрафу за гэты перыяд склала Br142 млн.