Набор на бюджэтныя месцы ў ВНУ могуць скараціць

Пра гэта заявіў міністр адукацыі Сяргей Маскевіч.

Дэмаграфічная сітуацыя ў Беларусі такая, што колькасць выпускнікоў школ памяншаецца. Па дадзеных Мінадукацыі, у 2010 годзе было 87 тыс. выпускнікоў, у 2011-м - 75 тыс., а ў гэтым годзе школу скончылі 64 тыс. чалавек. «Пры такім значным памяншэнні колькасці выпускнікоў прыём на бюджэт застаецца аднолькавым - у раёне 24 тыс. Між тым у наступным навучальным годзе ў Беларусі будзе 60 тыс. выпускнікоў, далей - 54 тыс.», - сказаў міністр падчас анлайн-канферэнцыі на сайце БелТА .

«У гэтай сітуацыі мы будзем, безумоўна, арыентавацца на патрэбы эканомікі, сацыяльнай сферы ў кадрах з вышэйшай адукацыяй. Калі не будзе неабходнасці ў тым, каб падтрымліваць такую вялікую колькасць бюджэтных месцаў, то, думаю, можна будзе паменшыць набор», - дадаў Сяргей Маскевіч.

На думку міністра, у гэтым выпадку колькасць тых, хто пажадае паступаць на платнай аснове, будзе, па меншай меры, балансаваць з цяперашнімі паказчыкамі. «Тады ВНУ прыватнай формы ўласнасці змогуць канкураваць за гэтых абітурыентаў з дзяржаўнымі. І калі змогуць прадэманстраваць свае перавагі для маладых людзей, значыць, будуць развівацца», - лічыць Сяргей Маскевіч.

Аднак ён не выключае, што па меры таго, як будзе памяншацца колькасць абітурыентаў, праблема з камплектаваннем ВНУ ў цэлым будзе абвастрацца. У прыватных - у асаблівасці.

У сувязі з гэтым міністэрства арыентуе прафесійна-тэхнічныя, сярэднія спецыяльныя, вышэйшыя ўстановы адукацыі на тое, каб яны развівалі іншыя віды дзейнасці. «ССНУ і ПТВ, напрыклад, на тое, каб разам з ВНУ займаліся развіццём экспарту адукацыйных паслуг. Тут у нас ёсць яшчэ нямала рэзерваў для таго, каб быць канкурэнтаздольнымі за мяжой», - адзначыў Сяргей Маскевіч.

ВНУ жа, на погляд міністра, неабходна асвойваць англамоўныя праграмы, вылучацца ў тыя рэгіёны, дзе ёсць патрэба ў адукацыйных паслугах.