Тры менскія студэнткі напалі на ізраільскага бізнэсмэна

Супрацоўнікі праваахоўных органаў затрымалі ў Менску трох студэнтак па падазрэнні ў здзяйсненні разбойнага нападу на ізраільскага бізнэсмэна.

«У дачыненні да затрыманых распачата крымінальная справа па ч. 2 арт. 207 (разбойны напад, здзейснены з пранікненнем у жыллё групай асоб) Крымінальнага кодэкса Беларусі», - паведаміў агенцтву «Інтэрфакс-Захад» у чацвер афіцыйны прадстаўнік Следчага камітэта па Менску падпалкоўнік юстыцыі Аляксандр Герасімаў. Паводле яго слоў, «затрыманыя змешчаны ў следчы ізалятар, праводзяцца следчыя дзеянні».

Як распавялі агенцтву ў праваахоўных органах, грамадзянін Ізраіля - бізнэсмэн, 1956 года нараджэння - прыехаў у Беларусь па гасцявой візе, як турыст. «Ён практычна кожны год прыязджае ў Беларусь», - удакладнілі суразмоўцы.

Па іх словах, «як устанавілі следчыя, ізраільскі бізнесмен адправіўся на адну з менскіх дыскатэк, дзе пазнаёміўся з трыма студэнткамі 3 курса гандлёвага каледжа, менчанкамі. На дыскатэцы ён іх частаваў, пасля чаго дзяўчаты прапанавалі яму паехаць працягнуць знаёмства на кватэру, якую ён здымаў».

«У кватэры, пакуль двое з дзяўчат адцягвалі ўвагу замежніка, адна са студэнтак выняла з кішэні знятага адзення $2 тыс., пасля чаго ўсе трое сабраліся сыходзіць. Ізраільскі бізнэсмэн ім заявіў, што бачыў, як яны скралі грошы, стаў перад уваходнымі дзвярыма і заявіў : «Ідзіце, але грошы аддайце», - распавялі ў праваахоўных органах.

«Ён таксама папярэдзіў дзяўчат, што патэлефануе ў міліцыю. Але паколькі не ведаў, як датэлефанавацца, патэлефанаваў сябру, у якога здымаў кватэру, і папрасіў прыехаць і выратаваць яго.

Пасля гэтага званка, дзяўчыны пырснулі бізнесмену ў вочы з газавага балончыка, сталі пагражаць нажом, кідаць у яго шклянкамі», - паведамілі ў суразмоўцы агенцтва.

Далей, па іх словах, «у кватэру па выкліку прыяцеля бізнэсмэна прыбылі супрацоўнікі аховы і следча-аператыўная група». «Пакуль яны ехалі, дзяўчаты спрабавалі схаваць грошы - у ваннай, іншых пакоях кватэры. Але пры асабістым даглядзе ў іх было выяўлена каля $1,5 тыс. і дзве бутэлькі дарагога віскі», - распавялі ў праваахоўных органах.

Там удакладнілі, што «грамадзянін Ізраіля атрымаў нязначныя цялесныя пашкоджанні. Гасцявая віза яму была выдадзена на перыяд з 13 па 19 жніўня».

Паводле Крымінальнага кодэксу Беларусі затрыманым пагражае да 15 гадоў пазбаўлення волі.