У Польшчы затрымалі былога гендырэктара «Пінскдрэва»

(абноўлена) Затрыманне адбылося пасля звароту прадстаўнікоў беларускага Інтэрпола да польскай паліцыі.

Аб гэтым паведамляе «Еўрарадыё» са спасылкай на РАР.

Польская паліцыя высветліла, што Лоран Арыніч жыве каля горада Радам у арандаваным доме. Была падрыхтавана засада, з якой ішло назіранне за раёнам і домам. Калі ў паліцыі не засталося сумневаў, што ў доме жыве Арыніч, ён быў арыштаваны. Былы дырэктар «Пінскдрэва» быў вельмі здзіўлены затрыманню і не супраціўляўся. Ён быў дастаўлены ў паліцэйскі ўчастак, дзе будзе чакаць судовага рашэння па пытанні экстрадыцыі ў Беларусь. Генеральная пракуратура Беларусі зараз рыхтуе матэрыялы для экстрадыцыі Арыніча з Польшчы.

Нагадаем, 25 кастрычніка 2010 года на фабрыцы «Пінскдрэў ДСП» адбыўся выбух. Загінулі 14 чалавек, а яшчэ 21 рабочы атрымаў траўмы рознай ступені цяжкасці.

23 сакавіка 2012 года адбыўся суд па крымінальнай справе аб выбуху на «Пінскдрэве». У якасці абвінавачаных перад судом паўсталі былыя галоўны інжынер «ЗАТ «Холдынгавая кампанія «Пінскдрэў» Уладзімір Шастакоў, дырэктар «Пінскдрэў-ДСП» Леанід Логвін і галоўны інжынер гэтага прадпрыемства Ігар Логвін.

Суд прызнаў усіх трох вінаватымі. Леанід Логвін быў прызнаны вінаватым у службовай халатнасці і прысуджаны да 4 гадоў абмежавання волі без накіравання ў папраўчую ўстанову адкрытага тыпу. Ігара Логвіна і Уладзіміра Шастакова суд прызнаў вінаватымі ў парушэнні пажарнай бяспекі, якая прывяла да гібелі людзей і нанясенні матэрыяльнай шкоды ў буйным памеры. Логвін быў прысуджаны да пазбаўлення волі тэрмінам на тры гады з накіраваннем у выпраўленчую калонію ва ўмовах пасялення, Шастакоў - да такога жа пакарання на 4 гады.

Спачатку супрацоўнікі праваахоўных органаў паведамлялі, што гендырэктар «Пінскдрэва» Лоран Арыніч з іх ведама знаходзіцца на лячэнні ў Польшчы. Аднак восенню 2011 ён быў аб'яўлены ў вышук. Тады заяўлялася, што калі ён сам не вернецца на радзіму, то пытанне аб яго выдачы будзе вырашацца на ўзроўні Генеральных пракуратур Беларусі і Польшчы.