Макей паабяцаў Ірану вечную падтрымку

Міністр замежных спраў Беларусі Уладзімір Макей выступіў 30 жніўня на саміце Руху недалучэння ў Тэгеране.

У пачатку сваёй прамовы кіраўнік МЗС РБ павітаў новага старшыню РН - Іран, які, паводле яго слоў, заступіў на гэты пост у складаны час выклікаў і магчымасцяў. «Вы заўсёды можаце разлічваць на Беларусь», - заявіў Уладзімір Макей, звяртаючыся да іранскай дэлегацыі.

Галоўнай тэмай выступу беларускага міністра стала неабходнасць змяшчэння вектара дзейнасці РН з палітыкі на эканоміку, так як, на яго думку, менавіта гэта дыктуе сапраўднае становішча спраў у свеце, перадае "Телеграф".

Кіраўнік МЗС Беларусі падкрэсліў, што на сённяшні дзень у свеце пануюць багатыя і эканамічна развітыя краіны. «Мы заўсёды кажам пра Рух недалучэння як пра сур'ёзнага іграка на сусветнай арэне, якога астатнія павінны паважаць і з якім павінны лічыцца. Ці можам мы набыць такі статус у сучасным карыслівым свеце, прытрымліваючыся толькі палітычнага падыходу і сілы пераканання? Я баюся, што адказ будзе адмоўным, і Беларусь занепакоеная гэтым», - сказаў Уладзімір Макей.