БТ не будзе трансляваць матч БАТЭ - «Дэбрэцэн»

БАТЭ сёння гуляе з венгерскім «Дэбрэцэнам» за выхад у плэй-оф Лігі чэмпіёнаў.

Матч пройдзе ў Венгрыі на стадыёне «Шоштоі ут» у горадзе Нірэдзьхазе. Гульня пачнецца ў 21.30 па менскім часе, паведамляе сайт БАТЭ.

Гэта будзе зваротны паядынак 3-га кваліфікацыйнага раўнда Лігі чэмпіёнаў.

Нагадаем, што 1 жніўня на сваім полі БАТЭ згуляў з венгерскай камандай унічыю - 1:1. Пераможца пары выйдзе ў плэй-оф кваліфікацыі Лігі чэмпіёнаў. Каманда, якая прайграла будзе далей гуляць у плэй-оф-кваліфікацыі Лігі Еўропы.

Адзначым, што сённяшні матч беларускія тэлеканалы не пакажуць.

Тэкставую анлайн-трансляцыю сустрэчы плануе правесці афіцыйны сайт ФК БАТЭ.