Менгарвыканкам: Вуліцы Быкава ў Менску не будзе
38
15:29, — Грамадства
Перыяд перайменавання сталічных вуліц скончаны, заявіў намеснік старшыні Менгарвыканкама Ігар Карпенка на прэс-канферэнцыі 8 жніўня ў Менску.
«Мы хочам сёння сысці ад перайменавання вуліц, гэты перыяд мы прайшлі ў пачатку 90-х гадоў», - цытуе Карпенку БелаПАН. Паводле яго слоў, камісія па найменні і перайменаванні вуліц лічыць, што называць імёнамі гістарычных дзеячаў неабходна новыя вуліцы, у чым неабходна прытрымлівацца прынцыпу гістарызму. У цяперашні час у банку дадзеных патэнцыйных назваў вуліц каля 40 найменняў. Як адзначыў чыноўнік, «ніякіх крытэраў для занясення ў банк дадзеных няма», разглядаюцца ўсе прапановы ад розных арганізацый і прыватных асоб.
Сярод тых, чыі імёны змогуць насіць новыя вуліцы ў Менску, - пісьменнік Васіль Быкаў, сказаў Карпенка, адзначыўшы, што ўвекавечанне памяці не абавязкова павінна адбывацца праз назвы вуліц. У прыклад чыноўнік прывёў стварэнне музея Быкава, які адкрыецца ў хуткім часе ў сталіцы. «Я б не драматызаваў гэтую сітуацыю, - заўважыў Карпенка. - У апошні час у Менску з'явіліся вуліцы імя беларускага кампазітара Юрыя Семянякі і акадэміка, этнографа Яўхіма Карскага».
Адказваючы на пытанне, наколькі дарэчныя такія назвы вуліц у цэнтры горада, як Рэвалюцыйная, Камсамольская, Леніна, Маркса і іншыя падобныя, Карпенка сказаў, што, напрыклад, назва «Рэвалюцыйная» - «самая бяскрыўдная назва з пункту гледжання ідэалогіі, а тэма рэвалюцыйных хваляванняў існавала на працягу ўсёй гісторыі чалавецтва». Што датычыцца вуліцы Карла Маркса, то Карпенка адзначыў, што яна названая імем філосафа, чыі працы вывучаюцца ў многіх універсітэтах свету. Праўда, вось пра Леніна і камсамол аргументаў ў чыноўніка не знайшлося.
Пры гэтым ён падкрэсліў, што існуе працэдура, на падставе якой вуліцам прысвойваецца тая ці іншая назва. Пасля разгляду камісіяй па найменні і перайменаванні вуліц Менгарвыканкам публікуе інфармацыю ў двух гарадскіх газетах і на сваім сайце. У выпадку пярэчанняў грамадзян камісія збіраецца паўторна. Рашэнне па назве вуліц прымаецца на сесіі Менскага гарадскога савета «дэпутатаў».
Напісаць каментар (38)
Навіны
па тэме
- Мингорисполком: Нет веских оснований для станции метро имени Быкова
- Для музея Васіля Быкава - 25 квадратных метраў
Экспарт
Новости партнеров
