Дыктатар паскардзіўся ў ААН на санкцыі

Беларускія ўлады просяць абараніць іх ад эканамічных санкцый.

Аб гэтым паведамілі агенцтву «Інтэрфакс-Захад» у прэс-службе міністэрства замежных спраў.

Там растлумачылі, што ў панядзелак у штаб-кватэры ААН у Нью-Йорку адбылося міністэрскае пасяджэнне ЭКАСАС, прысвечанае тэме «Усеабдымная, трывалая і эфектыўная шматбаковая сістэма ў мэтах дасягнення ўстойлівага развіцця: неабходныя крокі», на якім выступіў памочнік Лукашэнкі Валянцін Рыбакоў.

«Рыбакоў падкрэсліў, што ЭКАСАС павінен дзейсна забяспечваць няўхільнае захаванне прынцыпаў свабоднага і сумленнага гандлю, якія выключаюць прымяненне розных пратэкцыянісцкіх мер і аднабаковых эканамічных санкцый», - паведамілі ў прэс-службе МЗС.

Памочнік прэзідэнта Беларусі заклікаў удзельнікаў пасяджэння надаваць асаблівую ўвагу адраснаму садзейнічанню краінам з сярэднім узроўнем даходу, да якіх адносіцца і Беларусь, для фарміравання асноў дынамічнага развіцця сусветнай эканомікі.

Падчас свайго выступлення прадстаўнік Беларусі азнаёміў удзельнікаў пасяджэння з бачаннем рэспублікай шляхоў практычнага ажыццяўлення вынікаў Канферэнцыі ААН па ўстойлівым развіцці, якая прайшла ў чэрвені 2012 года ў Рыа-дэ-Жанейра, а таксама адзначыў неабходнасць узмацнення ролі ЭКАСАС, мандат якога дазваляе комплексна займацца ўсімі аспектамі сацыяльных, эканамічных і прыродаахоўных праблем.

У гэты ж дзень Рыбакоў прыняў удзел у нарадзе высокага ўзроўню «Устойлівая энергетыка для ўсіх», якая была ініцыявана генеральным сакратаром ААН. У ходзе праведзенай дыскусіі беларускі дэлегат выступіў з прапановай выкарыстоўваць напрацоўкі ААН для вызначэння практычных міжнародных мер па стварэнні механізму перадачы тэхналогій прымянення новых і аднаўляльных крыніц энергіі краінам, якія ў гэтым маюць патрэбу, паведамілі ў прэс-службе МЗС.