У Баранавічах студэнта засыпала пяском у трохметровай яме

Трэцякурснік Баранавіцкага дзяржаўнага прафесійнага ліцэя будаўнікоў застаўся жывы, але яго стан вельмі цяжкі.

Малады чалавек быў засыпаны пластом грунта і перажыў клінічную смерць, піша tomin.by.

Надзвычайнае здарэнне адбылося днём 25 верасня на тэрыторыі старога гарадскога парку на вуліцы Камсамольскай.

Як атрымалася высветліць, на будпляцоўцы пункта грамадскага харчавання праводзіліся земляныя работы па прыладжванню адводу каналізацыйных труб. Каля 12.40 у яме раптам абрынуўся пясок. Аднаго з рабочых - 18-гадовага навучэнца, які праходзіў практыку ў прыватным прадпрыемстве, засыпала па галаву, ён не мог дыхаць.

Але на шчасце хлопца, побач з месцам здарэння апынуўся сантэхнік прыватнага прадпрыемства 1971 года нараджэння, на дапамогу якому прыйшлі іншыя рабочыя. Яны змаглі хутка раскапаць маладога чалавека і выклікаць хуткую. Брыгада медыкаў, пераадолеўшы адлегласць у паўтара кіламетра за кароткі час, прымчалася своечасова...

Пацярпелага, які быў без прытомнасці і знаходзіўся ў вельмі цяжкім стане, экстрана шпіталізавалі ў Баранавіцкі гарадскі шпіталь №1.

Медыкі паставілі папярэдні дыягназ: механічная асфіксія, закрыты пералом шыйнага аддзела хрыбетніка, клінічная смерць.

Пацярпелы малады чалавек - жыхар вёскі Мілавіды Баранавіцкага раёна. Толькі некалькі дзён таму яму споўнілася 18 гадоў...

Начальнік Баранавіцкай міжраённай інспекцыі па працы Канстанцін Турыбрын так пракаментаваў сітуацыю: «25 верасня мы высветлілі, што навучэнец ліцэя быў накіраваны ў будаўнічую арганізацыю для праходжання практыкі. Разам з аднакурснікам ён выконваў працы па рамонце офіса гэтай арганізацыі. У гэтым жа будынку размешчана іншая будаўнічая арганізацыя, кіраўніцтва якой і папрасіла хлопцаў папрацаваць на іх аб'екце. Са слоў другога вучня ліцэя, яны пагадзіліся папрацаваць, паколькі ў той арганізацыі, дзе яны праходзілі практыку, працы для іх не было. Некалькі дзён хлопцы працавалі на гэтым аб'екце без афармлення працоўных адносін. У момант НЗ хлопец спусціўся ў каналізацыйную яму для замеру яе глыбіні».

Абставіны здарэння зараз высвятляе Следчы камітэт.