Навасяд задумаўся

Палітык заяўляе аб магчымасці зняцця з «выбараў».

Уладзімір Навасяд быў дэпутатам Вярхоўнага Савета Беларусі 13-га склікання і «палаты прадстаўнікоў» 2-га склікання. У гэтым годзе ён зноў вылучыў сваю кандыдатуру. Аднак пасля таго, як яго праціўнікі не з'явіліся на дэбаты Уладзімір Навасяд заявіў «Радыё Свабода», што задумваецца аб зняцці сваёй кандыдатуры.

«6 верасня будзем праводзіць пасяджэнне цэнтральнага савета Партыі свабоды і прагрэсу (афіцыйна яна да гэтага часу не зарэгістраваная), на якім абмяркуем сітуацыю. Я вельмі спадзяваўся на тэлевізійныя дэбаты з удзелам іншых прэтэндэнтаў на дэпутацкі мандат. Моцна да іх рыхтаваўся, хацеў пераканаць выбаршчыкаў, каб яны галасавалі менавіта за мяне. Сёння прыйшоў на запіс, але ніхто з пяці маіх праціўнікаў або іх давераных асоб на запіс не з'явіўся.

Лукашэнка нядаўна казаў, што ўсе кандыдаты павінны ісці на «выбарах» да канца, паказаць тавар з лепшага боку. Дзе той тавар, дзе тыя бакі? Каб дамагчыся гэтых дэбатаў, некаторыя людзі ў турме сядзяць. А некаторым кандыдатам, мабыць, няма чаго сказаць выбаршчыкам?» - заявіў Уладзімір Навасяд.