У Ялце беларуска з куляй у грудзях затрымала злодзея (Відэа)

Злодзей спрабаваў выкрасці фотаапарат і грошы турыстаў з Беларусі на кватэры, якую яны арандавалі.

Трое хлопцаў і дзяўчына заўважылі злодзея з двара, дзе яны вячэралі. Калі злачынец саскочыў з балкона і кінуўся наўцёкі, беларусы пачалі яго пераследваць, паведамляе ўкраінскі тэлеканал «1+1».

Яны амаль дагналі хлопца, але ў гэты момант той дастаў пісталет і пачаў адстрэльвацца. Пасля некалькіх недакладных стрэлаў злодзей трапіў у 24-гадовую Вольгу. Але дзяўчына, нягледзячы на цяжкае агнястрэльнае раненне ў грудзі, затрымала мужчыну. Сябры пацярпелай скруцілі яго, а гераіні выклікалі «хуткую».

Злодзеем аказаўся 26-гадовы жыхар Сімферопаля, які раней ужо прыцягваўся да адказнасці за разбойны напад. У беларусаў ён спрабаваў сцягнуць фотаапарат, грошы і некалькі рэчаў.

За спробу забойства і разбой затрыманаму пагражае да 15 гадоў пазбаўлення волі.

Вольгу ўжо выпісалі са шпіталя, яна разам з сябрамі вярнулася ў Беларусь.