КДБ пачаў паляванне на мэнэджараў «Уралкалія» ў Расеі

(абноўлена) Беларускія спецслужбы спрабуюць затрымаць менеджэраў БКК на тэрыторыі Расеі.

Учора стала вядома аб тым, што супрацоўнікі беларускага КДБ спрабавалі захапіць у цэнтры Масквы і вывезці ў Менск былога начальніка фрахтавага аддзела кампаніі Дзмітрыя Самойлава. Сочку за сабой выявілі і іншыя супрацоўнікі, якіх абвясцілі ў вышук улады Беларусі. Выданне «Коммерсант» мяркуе, што беларускія спецслужбы шукаюць замену гендырэктару «Уралкалія» Уладзіславу Баўмгертнеру, у якога сёння заканчваецца тэрмін папярэдняга зняволення.

Прадстаўнік бізнесоўцаў распавёў пра падрабязнасці інцыдэнту. Спроба затрымання адбылася ўчора ў цягніку Масква-Санкт-Пецярбург. Незадоўга да адпраўлення ў вагон зайшлі чацвёра мужчын у цывільным. Адкрыўшы дзверы купэ, у якім размяшчаўся Дзмітрый Самойлаў, яны спрабавалі наладзіць яго затрыманне. Прад'явіўшы бізнесоўцу пасведчання аб тым, што яны з'яўляюцца супрацоўнікамі КДБ Беларусі, і паведаміўшы, што яны павінны даставіць яго да следчага, што аб'явіў яго ў вышук, прапанавалі спадару ісці за імі. Разумеючы, што шанцаў здзейсніць супраціў у вагоне ў яго няма, Дзмітрый Самойлаў, узяўшы рэчы і дакументы (ён ехаў у Санкт-Пецярбург да жонкі), адправіўся за чэкістамі. Аднак, калі працэсія праходзіла поруч з паліцэйскімі, што дзяжурылі на платформе Ленінградскага вакзала Масквы, ён закрычаў, што яго выкрадаюць.

Вартавыя парадку даставілі ўсіх пецярых удзельнікаў інцыдэнту ў аддзел паліцыі, дзе іх апыталі. Дзмітрый Самойлаў, у прыватнасці, паведаміў, што ён з'яўляецца грамадзянінам Расеі, а супрацоўнікі КДБ Беларусі спрабавалі незаконна яго затрымаць, з тым каб вывесці ў Менск. Адзначым, што ў адпаведнасці з Канстытуцыяй Расея сваіх грамадзян нікому не выдае, а яе праваахоўныя органы могуць выканаць даручэнне аб допыце з іншай краіны, толькі атрымаўшы адпаведны запыт. Тым не менш затрымліваць чэкістаў паліцыянты не сталі. Ва ўсякім выпадку, калі выкліканы Дзмітрыем Самойлавым адвакат прыехаў у аддзел паліцыі, беларускія вартавыя парадку яго ўжо пакінулі.

Расейскі партал Life News паведамляе іншую версію інцыдэнту. Ён піша, што былога начальніка фрахтавага аддзела БКК Дзмітрыя Самойлава спрабавалі затрымаць расейскія паліцэйскія ў справе запыту беларускага боку. Нягледзячы на гэта, у экстрадыцыі бізнесоўца ў Менск было адмоўлена.

«У Маскве супрацоўнікі праваахоўных органаў затрымалі для праверкі Начальніка фрахтавага аддзела беларускай кампаніі Дзмітрыя Самойлава. Яго знялі з цягніка, які накіроўваўся ў Санкт-Пецярбург з Ленінградскага вакзала. Бізнесовец, які знаходзіцца ў міждзяржаўным вышуку, трапіў у поле зроку паліцыі пасля таго, як набыў на вакзале чыгуначны квіток», - піша партал.

Аператыўна адрэагаваўшы на сігнал, супрацоўнікі праваахоўных органаў даставілі Дзмітрыя Самойлава ў пракуратуру. У міждзяржаўны вышук Самойлаў быў аб'яўлены згодна з запытам Беларусі.

Пасля праверкі супрацоўнікі пракуратуры заявілі, што Самойлаў з'яўляецца грамадзянінам РФ і падстаў для яго выдачы ў расейскага боку няма. Пасля высвятлення ўсіх абставінаў Дзмітрый Самойлаў быў вызвалены.

Атрымаць афіцыйныя каментары з гэтай нагоды ў ГУ МУС Масквы і МУС Расеі не ўдалося.

У Камітэце дзяржбяспекі Беларусі заявілі, што распаўсюджаная інфармацыя аб спробе затрымання беларускімі спецслужбамі ў Маскве аднаго з былых топ-мэнэджараў Беларускай калійнай кампаніі носіць правакацыйны характар, і адмовіліся яе каментаваць.

«Распаўсюджаная інфармацыя з'яўляецца відавочнай правакацыяй, мы яе не каментуем», - заявіў у пятніцу начальнік прэс-службы беларускага КДБ Артур Стрэх.

У сваю чаргу прадстаўнік Дзмітрыя Самойлава заявіў, што апергрупы з Беларусі палявалі не толькі за ім, але і іншымі топ-мэнэджарамі БКК.

Дарэчы, гэта не першая спецаперацыя беларускага КДБ у Маскве. Напрыклад, у лістападзе 2010 года з гандлёвага комплексу «Акрайцу» быў выкрадзены і вывезены ў Менск лідэр беларускіх анархістаў Ігар Аліневіч. За серыю акцый, праведзеных анархістамі у казіно і банках, яму прызначылі максімальны тэрмін у восем гадоў зняволення.

Нагадаем, што, затрымаўшы 26 жніўня гендырэктара ААТ «Уралкалій» Уладзіслава Баўмгертнэра і абвінаваціўшы яго ў злоўжываннях і крадзяжах, Следчы камітэт (СК) Беларусі абвясціў у вышук ўладальніка гэтай кампаніі Сулеймана Керымава, чальца назіральнага савета ААТ Алега Пятрова, першага намесніка гендырэктара кампаніі Канстанціна Саладоўнікава, а таксама намесніка гендырэктара фінансаў Ігара Еўстратава і начальніка фрахтавага аддзела Дзмітрыя Самойлава. Прадстаўнік СК Беларусі заявіў, што падазраваныя абвешчаныя ў міжнародны вышук і ў Інтэрпол, аднак, перш чым прымаць такую пастанову, у арганізацыі правялі дадатковую праверку, паведаміўшы пасля, што прынамсі Сулеймана Керымава ў вышуку няма (на сайце Інтэрпола адсутнічаюць вышуковыя карткі і іншых удзельнікаў калійнага скандалу).

Між тым сёння заканчваецца тэрмін двухмесячнага арышту Уладзіслава Баўмгертнэра, які ён даседжвае пад аховай супрацоўнікаў КДБ на здымнай кватэры ў Менску. За вызваленне кіраўніка «Уралкалія» Лукашэнка афіцыйна запатрабаваў $100 млн, але крыніцы ў кампаніі далі зразумець, што выкуп плаціць не збіраюцца. Тым больш што экстрадыцыю з Менска Уладзіслава Баўмгертнэра павінен запатрабаваць Следчы камітэт Расеі, які ўзбудзіў крымінальную справу паводле матэрыялаў з Менска.